Waziri Jafo ataka wanaotupa taka watozwe faini

Waziri wa Nchi, Ofisi ya Rais Tawala za Mikoa na Serikali za Mitaa, Suleiman Jafo ameiagiza Halmashauri ya Mji wa Geita kuanza kuwatoza faini watu wanaotupa taka ovyo na kuharibu miundombinu ya barabara na madaraja

Waziri Jafo ametoa agizo hilo leo Agosti,9,2018 wakati wa ziara yake ya siku moja katika Halmashauri ya Mji  wa Geita alipotembelea ujenzi wa barabra ya lami na soko la kisasa miradi inayotekelezwa na fedha za Serikali kuu na mapato ya ndani ya halmashauri

Amesema utunzaji wa mazingira ni jambo la msingi katika kuleta maendeleo na kuzitaka halmashauri zote kuhakikisha madaraja yanayojengwa yanatunzwa na kusimamiwa kutokana na tabia za wananchi kutupa taka ovyo zinazosababisha madaraja kuziba

“Mkurugenzi hakikisheni mnaweka faini kwenye suala la mazingira, Serikali inatumia fedha nyingi lakini wananchi wanatupa viroba na takataka nyingine,”amesema Jafo

Katika ziara yake ya kutembelea soko la kisasa linalojengwa mjini Geita aliutaka uongozi wa halmashauri kuhakikisha ujenzi unakamilika haraka kutokana na muda aliopewa mkandarasi kumalizika