Rais Magufuli ampa pole Dk Kigwangalla

Rais John Magufuli amempa pole Waziri wa Maliasili na Utalii, Dk Hamisi Kigwangalla aliyepata ajali ya gari leo Jumamosi Agosti 4, 2018 mkoani Manyara na kupata majeraha sehemu mbalimbali mwilini

Taarifa iliyotolewa leo na Mkurugenzi wa Mawasiliano ya Rais Ikulu, Gerson Msigwa inasema kiongozi mkuu huyo wa nchi amemuombea waziri huyo apone haraka na kuwashukuru madaktari na wauguzi wa kituo cha afya Magugu walioanza kumpa huduma ya kwanza

Pia, amewashukuru viongozi  wa hospitali ya Selian ya jijini Arusha kwa juhudi walizozifanya kuokoa maisha ya Dk Kigwangalla na majeruhi wengine wa ajali hiyo

Rais Magufuli ametoa salamu za pole kwa familia, wafanyakazi wa wizara, ndugu, jamaa na marafiki wote kufuatia kifo cha ofisa habari wa wizara hiyo, Hamza Temba

Taarifa hiyo inaeleza kuwa leo jioni Rais Magufuli aliungana na viongozi wa wizara hiyo kumpokea Dk Kigwangalla katika Uwanja wa Ndege wa Kimataifa wa Julius Nyerere (JNIA) jijini Dar es Salaam

Dk Kigwangalla amesafirishwa kwa ndege kutoka Arusha kuja jijini hapa kwa matibabu zaidi

Inaeleza kuwa waziri huyo amepata ajali katikati ya vijiji vya Mdolii na Minjingu Wilaya ya Babati mkoani Manyara baada ya gari lake kupinduka na kusababisha kifo cha Temba huku watu wengine watano akiwemo yeye kuumia

Akiwa JNIA, Rais Magufuli alikuwa pamoja na Mkuu wa Mkoa wa Arusha, Mrisho Gambo, Naibu Waziri wa Maliasili na Utalii, Japhet Hasunga, Katibu Mkuu wa Wizara hiyo, Meja Jenerali Gaudence Milanzi na Katibu Mkuu wa Wizara ya Afya, Dk Mpoki Ulisubisya