Museveni awashtumu madaktari waliogoma

Sembabule, Uganda. Rais Yoweri Museveni amezungumzia suala la mgomo wa madaktari na kwa hasira amewaita wote walioweka vifaa chini mwishoni mwa mwaka jana kuwa ni “maadui wa Uganda wanaopaswa kuchukuliwa hivyo.” Madaktari kote nchini waligoma kwa wiki tatu Novemba mwaka jana wakishinikiza Serikali kutekeleza lundo la matakwa yao ambayo ni kuboresha mishahara yao na marupurupu ya nyumba, magari, wafanyakazi wa nyumbani na kufanyiwa mageuzi kitengo cha kusimamia afya cha Ikulu Masuala mengine muhimu ambayo madaktari walihitaji ni upatikanaji wa uhakika wa dawa, huduma nzuri na mafunzo bora kwa wanafunzi wa udaktari Mgomo ule ulisababisha huduma za afya kudorora nchini na wagonjwa wengi walikufa kutokana na ukosefu wa huduma au kucheleweshewa matibabu Mkwamo huo wa huduma za afya ulisababisha Serikali kuingia katika mpango uliopingwa wa kuagiza madaktari 200 kutoka Cuba kuchukua nafasi za waliogoma Lakini, akizungumza katika maadhimisho ya Siku ya Wafanyakazi Duniani akiwa katika Wilaya ya Sembabule, Museveni kwa ari kubwa alitetea uamuzi tata wa Serikali wa kuagiza madaktari kutoka nje akiwashtumu madaktari wazawa kwa usaliti na “kuonyesha tabia mbaya na kinyume cha taaluma”.