WAZIRI AAGIZA WATAALAMU WATAKIWA KUFANYA KAZI MCHANA NA USIKU

Wataalamu wa Mamlaka ya Majisafi na Usafi wa Mazingita katika Halmashauri ya Manispaa ya Lindi (Luwasa), wametakiwa kufanya kazi mchana na usiku ili kubaini changamoto zilizopo kwenye miundombinu na kuchukua hatua.

Agizo hilo llimetolewa na Waziri wa Maji na Umwagiliaji, Isack Kamwelwe alipokuwa akizungumza na watendaji wa mamlaka hiyo alipotembelea kuona maendeleo ya utekelezaji wa mradi wa maji wa Ng’apa uliopo kwenye manispaa hiyo.

Amesema ameridhishwa na jitihada zinazofanywa na mkandarasi, huku akisikitishwa na kupasuka kwa mabomba wakati wa kusafirishia maji kutoka chanzo hicho hadi kwenye matanki

Kamwelwe amesema wizara yake imetekeleza miradi mbalimbali inayohusu maji ukiwemo wa Ruvu Juu na Chini katika Mkoa wa Pwani, lakini hajawahi kuona mabomba yakipasuka hovyo kama yalivyokuwa kwenye mradi huo wa Ng’apa

“Nimeshtuka kwa nini haya mabomba yanapasuka mara kwa mara, hivyo ninawaagiza watalaamu kaeni hapa na mfanye kazi mchana na usiku ili kuona shida ni nini?”amesema Kamwelwe.

Ameongeza kuwa kasoro zilizopo na mkandarasi aweze kuzirekebisha kabla hajaondoka kuelekea nchini kwao India.

Kwa Waziri Kamwelwe ni ziara ya pili mkoani Lindi ndani ya kipindi kisichozidi mwezi mmoja kukagua mradi huo, ambapo alimuondoa Mkurugenzi wa Luwasa, Riziki Chambuso kwa kushindwa kuwajibika ipasavyo na kumkaimisha Juma Sudi wa Manispaa ya Mtwara Mikindani (Mtuwasa)

Naye Mkuu wa wilaya hiyo, Shaibu Ndemanga akimwakilisha Mkuu wa mkoa, Godfrey Zambi amesema  ameanza kufarijika na kazi mzuri inayofanywa na kikosi kazi cha kutoka Mtuwasa

Amesema tangu waziri afanye mabadiliko hayo ya uongozi, baadhi ya maeneo kama vile Angaza na Mtanda wakazi wake wameanza kupata huduma ya majisafi na salama kwa matumizi ya binadamu

Mradi wa maji Ng’apa ulikabidhiwa kwa Kampuni ya Oia ya India mwaka 2013 na kazi hiyo ilitakiwa ikamilike Novemba 2015, lakini umekuwa ukisuasua utekelezaji wake na kusababisha wakurugenzi watatu wa Luwasa kuondolewa kwa madai ya kushindwa kusimamia upatikanaji wa huduma ya maji.