Msiba wasababisha mechi za leo Italia kuahirishwa

Shirikisho la soka nchini Italia (IFF) limetangaza kusogeza mbele mechi zote za leo za ligi kuu nchini humo kufuatia kifo cha beki na nahodha wa klabu ya Fiorentina David Astori.

Klabu ya Fiorentina imethibitisha kuwa Astori mwenye miaka 31 amekutwa kwenye chumba chake hotelini akiwa amefariki, mapema leo ikiwa ni saa chache tu kabla ya mchezo wa ligi kuu dhidi ya Udinese.

"Fiorentina tunasikitika kutangaza kwamba nahodha David Astori amefariki, kwa hali hii ya kutisha na ya kushangaza, na juu ya yote kutokana na heshima kwa familia yake tunaomba utulivu kwaajili ya taarifa zaidi'', imeeleza taarifa ya klabu.

Baada ya muda mfupi IFF nao wakatangaza kusogeza mbele mechi zote za leo ikiwa ni jumla ya mechi 7 zilizokuwa zikianza kwa nyakati tofauti kama ambavyo zinaonekana kwenye picha chini.

David Astori alijiunga na Fiorentina inayoshika nafasi ya 10 kwenye msimamo, mwaka 2015 akitokea Cagliari ambayo awali  ilimpeleka kwa mkopo AS Roma na kisha Fiorentina ambayo ilimnunua moja kwa moja. Ameichezea timu hiyo mechi 90 na kufunga mabao 3.