CCM yakabidhi migogoro ya ardhi kwa Mabula

Chama cha Mapinduzi (CCM) kimemkabidhi Naibu Waziri wa Ardhi, Nyumba na Maendeleo ya Makazi, Angelina Mabula migogoro miwili ya ardhi mjini Moshi kikitaka asaidie kuipatia ufumbuzi.  Migogoro hiyo ni pamoja na wa Pasua block JJJ ambapo wananchi zaidi ya 100 waligawiwa viwanja na Manispaa ya Moshi lakini kampuni ya Hodhi ya Rasilimali za Reli (Rahco), inadai ni mali yake. Mgogoro mwingine aliouwasilishiwa ni wa Meresini katika mji mdogo wa Himo, ambapo wananchi wananyimwa viwanja vikiwamo vya kujenga shule, na kupewa watu wengine akiwamo mwekezaji. Akiwasilisha migogoro hiyo jana Februari 28, 2018 na nyaraka zake ikiwamo hati miliki kwa naibu waziri huyo, Katibu wa CCM mkoani Kilimanjaro, Jonathan Mabhia amesema migogoro hiyo ni kero inayohitaji majibu. Akijibu maombi hayo, Mabula amesema kwa kuwa mgogoro wa Pasua block JJJ umewasilishwa ukiwa na vielelezo vya nyaraka, atazipitia nyaraka hizo na kumkabidhi kamishna wa ardhi. Kuhusu mgogoro wa Mieresini, amesema nalo amelichukua ili aweze kulifuatilia aone namna ugawaji huo ulivyofanyika na kilio cha wananchi wa eneo hilo.