TANI 150 ZA MCHELE ZAKAMATWA BANDARINI

WAKALA wa Chakula, Dawa na Vipodozi Zanzibar, imezuia kuingiza nchini tani 150 za mchele aina ya red rose wenye thamani ya zaidi ya Sh. milioni 180 katika Bandari ya Malindi Zanzibar.

Mchele huo uliotoka nchini Pakistani ambao ni  mali ya GAGO Store, uliingizwa nchini Februari 13, mwaka huu baada ya kufanyiwa uchunguzi wa kimaabara na kugundulika haufai kwa matumizi ya binadamu

Kaimu Mkurugenzi Idara ya Udhibiti, Usalama, Chakula katika Wakala wa Chakula Dawa na Vipodozi, Dk. Khamis Ali Omar, alisema mchele huo pia haukidhi vigezo vya vifungashio na maandishi na kuweka taarifa zisizo sahihi kwa kuandikwa mchele grade namba moja wakati si kweli Aidha, alisema mchele huo ulionyesha ulikusudiwa kwa soko la Mauritius badala ya Zanzibar jambo ambalo ni kinyume na utaratibu za uagizwaji wa bidhaa za chakula nchini Alisema hatua zitakazochukuliwa ni mwenye mali kuurudisha mchele huo ulikotoka na akishindwa hatua zitakazo chukuliwa ni kuteketeza mchele  huo, ili usiweze kuathiri jamii. Mkuu wa Kitengo cha Usalama wa athari zinazotokana na chakula, Aisha Suleiman Mbandakazi, alisema athari zinazotokana na chakula kisichofaa kwa matumizi ya mwanadamu ikiwamo mchele ni pamoja na  matatizo ya akili, ukungu unaozalisha sumu kuvu inayosababisha matatizo ya ini pamoja na kizazi.