Bilioni 1.92 zatolewa na serikali

Serikali imepeleka shilingi bilioni 1.92 katika Halmashauri ya Mji wa Nanyamba wilayani Mtwara kwa ajili ya ujenzi na uboreshaji wa vituo vya afya na kuwasisitizia watendaji kutobadilisha matumizi ya fedha hizo wazipatapo.

Hayo yalibainika wakati Waziri Mkuu Kassim Majaliwa alipozungumza na wakazi wa Halmashauri hiyo, wakati wa ziara ya kikazi mkoani Mtwara  na kusema fedha hizo zilitolewa na serikali ili kuimarisha upatikanaji wa huduma za afya kwa wananchi.

Waziri Mkuu amesema ujenzi huo utahusisha chumba cha upasuaji, maabara, chumba cha kujifungulia, jengo la mama na mtoto na wodi ya wanawake na wanaume, eneo la kuchomea taka na chumba cha kuhifhadhia maiti.

"Serikali imeamua kuimarisha sekta ya afya kwa kujenga na kuboresha vituo vya afya ili kuhakikisha wananchi wanapata huduma za afya karibu na makazi yao", amesema Waziri Mkuu.

Aidha, Waziri Mkuu amewataka wananchi hao kuendelea kuiunga mkono serikali yao ambayo imedhamiria kuwatumikia ili waweze kupata maendeleo.

Pia Waziri Mkuu amesema serikali inatarajia kuipitia upya sheria ya elimu pamoja na sheria ya mtoto ili kuweka masharti ya kumlinda mtoto wa kike hususani kudhibiti mimba kwa wanafunzi.