YANGA YAIBUKA KIDEDEA DHIDI YA AZAMA FC

Mabingwa watetezi wa ligi kuu soka Tanzania Bara klabu ya Yanga imeibuka na ushindi wa mabao 2-1 kwenye mchezo wa ligi kuu raundi ya 15 dhidi ya Azam FC kwenye uwanja wa Azam Complex.

Yanga ilitokea nyuma ikisawazisha bao la mapema la Azam FC liliofungwa dakika ya 4 na mshambuliaji Shabaan Chilunda baada ya makosa yaliyofanywa na walinzi wa Yanga.

Mshambuliaji raia wa Zambia ambaye alikuwa amefungiwa mechi tatu Obrey Chirwa, leo alikuwa anarejea baada ya kumaliza adhabu yake hiyo na alifanikiwa kusawazisha bao hilo dakika ya 30 akitumia vizuri makosa ya mlinda mlango wa Azam FC Razak Abarola.

Mlinzi wa kushoto wa Yanga aliyesajiliwa msimu huu akitokea Azam FC Gadiel Michael ndiye aliyeimaliza Azam FC dakika ya 44 kwa kufunga bao la pili kupitia mkwaju wa mbali ambao ulimshinda mlinda mlango wa timu yake hiyo ya zamani.

Baada ya ushindi wa leo Yanga sasa imefikisha alama 28 na kuikaribia Azam FC yenye alama 30 katika nafasi ya pili nyuma ya Simba SC yenye alama 32 kileleni.