RC MAKALA ATEUA KAMATI YA KUCHUNGUZA MRADI WA BILIONI 4.8

 Mkuu wa mkoa wa Mbeya, Amos Makalla ameunda kamati maalum ya watu kumi kuchunguza utata wa utekelezaji wa mradi wa ujenzi wa ofisi mpya za halmashauri ya wilaya ya Chunya wenye thamani ya shilingi Bilioni 4.8 ambao umesimama tangu mwezi julai mwaka jana huku kazi ambayo imefanyika ikidaiwa kuwa hailingani na thamani ya fedha iliyolipwa kwa mkandarasi.

	Mkuu wa mkoa wa Mbeya, Amos Makalla amefanya ziara ya kushitukiza katika eneo la mradi wa ujenzi wa ofisi mpya za halmashauri ya wilaya ya Chunya, ambako ameshuhudia mradi huo ukiwa umesimama tangu mwezi julai mwaka jana na ndipo akaomba kupewa maelezo kuhusu sababu za mradi huo kusimama pamoja na kiasi cha fedha kilicholipwa.

	Baada ya kusikiliza maelezo hayo, mkuu huyo wa mkoa hakuridhika na mwenendo wa utekelezeji wa mradi huo hususan kiwango cha fedha kilicholipwa kwa mkandarasi ikilinganishwa na kazi iliyofanyika na ndipo akaagiza mkandarasi anayefanya kazi hiyo afike mara moja kwenye eneo la kazi, huku akiamua kuunda kamati ya watu 10 kuchunguza mradi huo.
	Kamati hiyo ya watu kumi ambayo imetangwazwa na mkuu wa mkoa wa Mbeya,Amos Makalla, inahusisha wajumbe kutoka taasisi mbalimbali za serikali mkoani Mbeya wakiwemo wataalamu wa ujenzi, polisi, usalama wa taifa na wataalam wa masuala ya fedha.