RAISI JPM"PASSPOT ZITAPUNGUZA USUMBUFU"

Rais Dkt. John Magufuli amesema kuzinduliwa kwa hati ya kusafiria Kielektroniki, nchini Tanzania itaweza kusaidia kupunguza usumbufu kwa watanzania pindi wanapotaka kwenda nje ya nchi.

Rais Magufuli ameeleza hayo leo Jijini Dar es Salaam wakati wa uzinduzi wa hati hiyo ambapo amesema kuwa huo ni mwanzo wa utekelezaji mkubwa wa uhamiaji mtandao ambao umepangwa kutekelezwa kwa awamu nne ili kuboresha zaidi utoaji wa vibali mbalimbali vinavyotolewa na uhamiaji.

"Passport tunayoizindua leo ina alama nyingi za usalama, hii itasaidia kupunguza, kama si kuondoa kabisa uwezekano wa kughushiwa. Zaidi ya hapo baadhi ya taarifa zake zitakuwa zinasomeka kwenye mifumo ya kielektroniki bila kulazimika kuipeleka yenyewe", alisema Dkt Magufuli.

Kwa upande mwingine, Dkt. Magufuli amesema mara baada ya awamu hiyo awamu ya pili itakua ni kufunga mfumo wa viza ya kielektroniki pamoja na hati za ukaaji za kielektroniki ambapo awamu ya tatu itakua ni usimamizi wa mipaka kwa njia za kielektroniki pamoja na kupanua huduma nyingine.