Rais Magufuli amlilia Jaji Kisanga

Rais John Magufuli amemtumia rambirambi Jaji Mkuu wa Tanzania, Ibrahim Juma kutokana na kifo cha Jaji mstaafu wa Mahakama ya Rufani, Robert Kisanga.

Jaji Kisanga alifariki dunia jana Jumanne Januari 23,2018 katika Hospitali ya Regency jijini Dar es Salaam.

Taarifa ya Ikulu iliyotolewa leo Jumatano Januari 24,2018  imemkariri Dk Magufuli akisema Jaji Kisanga atakumbukwa kwa mchango wake alioutoa kwa Taifa wakati wote wa utumishi wake.

Dk Magufuli amesema utumishi wa Jaji Kisanga ulijaa umakini, uchapakazi, uzalendo na ushirikiano kwa wengine, mambo ambayo yalimwezesha kupata mafanikio makubwa.

Sote tunafahamu kazi nzuri alizofanya akiwa katika majukumu ya kitaifa, mchango wake katika kuijenga taaluma ya uanasheria baada ya uhuru na uanzishaji wa Mahakama ya Rufani baada ya kuvunjika kwa Jumuiya ya Afrika Mashariki mwaka 1977, kwa hakika mchango wake hautasahaulika,” amesema.

Rais Magufuli amemuomba Profesa Juma kufikisha rambirambi kwa familia ya Jaji Kisanga, majaji na wanasheria wote, ndugu, jamaa na marafiki walioguswa na msiba huo.

Pia, amewaomba wafiwa kuwa na moyo wa subira, uvumilivu na ustahimilivu katika kipindi hiki cha majonzi.