MWANAFUNZI ASIMULIA ALIVYOTUMIWA NA POLISI KUWACHUKULIA HONGO

MWANAFUNZI wa Chuo Kikuu jijini Nairobi alijitokeza Alhamisi na kukiri kwamba yeye ni mmoja wa wanaotumiwa na polisi wa trafiki kuwakusanyia pesa kutoka kwa madereva barabarani.

Mwanamume huyo mwenye umri wa miaka 33 alifika katika afisi za Taifa Leo katika Nation Centre, Nairobi na kusema aliitwa na maafisa waliokuwa wakikagua magari katika barabara ya Haile Sellasie jijini Nairobi na kumpa kazi ya kukusanya pesa kutoka kwa madereva.

“Nilikuwa nikitoka kazini wakati afisa huyo aliponiita na kuniambia alitaka kuninunulia chai. Sikujua alivyomaanisha hadi aliponiagiza nimkusanyie pesa kutoka kwa madereva wa matatu na wa magari ya kibinafsi aliyosimamisha,” alisema mwanamume huyo ambaye hatuwezi kumtaja jina kwa usalama wake.

Alisema kwa muda wa saa moja, aliweza kukusanya zaidi ya Sh11,000. “Nimeamua kufichua kisa hiki baada ya kusoma habari katika gazeti la Taifa Leo kwa sababu ninaamini sio haki.

Inasikitisha kuna watu wanaounda pesa nyingi bila jasho, huku watu walio na digrii wakipiga lami na wengine wakifanya kazi ya ulinzi na kulipwa Sh6,000 kwa mwezi,” alisema mwanamume huyo, ambaye ni mwanafunzi katika chuo kikuu kimoja jijini Nairobi.

Alisema baada ya kukusanya pesa hizo, afisa huyo alimwelekeza katika hoteli moja kando ya barabara hiyo walipokutana msalani kumkabidhi hela alizokusanya.

“Alinipa Sh400 alizosema ni za kununua chai. Aliniambia pesa hizo hazikuwa zake bali za mkubwa wake aliyekuwa akimsubiri kwenye gari lililoegeshwa hatua chache kutoka nilikokuwa nikisimama baada ya kushuka kwenye gari kupokea pesa,” alidai mwanamume huyo.

Sio haki

Alisema anafanya kazi ya ulinzi kupata pesa za karo na kutunza familia yake na sio haki kwa watu kutumia njia za mkato kujipatia maelfu ya pesa.

Kulingana naye, madereva walikuwa wakimpatia kati ya Sh100 na 3,000 walivyokuwa wamekubaliana na afisa huyo ambaye alikuwa ameandamana na wenzake wawili.

“Ni makosa sana kwa mtu kutumia njia haramu kupata pesa nyingi huku watu wengine wakiteseka na hata kukosa pesa za chakula. Nikipewa nafasi, ninaweza kusaidia Tume ya Maadili na Ufisadi (EACC) kuwakamata maafisa hao nikihakikishiwa usalama wangu,” alieleza.

Alisema aligundua maafisa hao huwa wanawatumia vijana wasio na kazi kuwakusanyia pesa kutoka kwa madereva, ili kuficha wasikamatwe kwa kula rushwa.

“Polisi hao hubadilisha watu wa kuwakusanyia pesa na siku hiyo nilijua sikuwa wa kwanza kupatiwa kazi hiyo,” alieleza.