MSHUKIWA WA ULAGHAI WA SABUNI YA SH3.3 MILIONI AACHILIWA KWA DHAMANA YA SH50,000 PESA TASLIMU

MSHUKIWA wa ulaghai Alhamisi aliomba korti imwachilie kwa dhamana ndogo kwa vile anaugua ugonjwa wa Saratani.

Bi Lilian Awuor alimsihi hakimu mwandamizi Bi Martha Mutuku amwonee huruma na kumwachilia kwa dhamana isiyo ya juu akitilia maanani ni “mgonjwa sana”.

“Ikiwa nitapewa dhamana ya kiwango cha juu, sitaweza kuipata kwa vile naugua maradhi ya Saratani na yamenigharimu pesa nyingi,” Bi Awuor alimweleza hakimu.

“Je una hati yoyote kuonyesha unaendelea kupokea matibabu ya Saratani?” Bi Mutuku alimwuliza.

“Ndio niko na ushahidi," alijibu Awuor; kisha akampa stakabadhi kutoka hospitali anakoendelea kupata matibabu,

Mshtakiwa aliyekanusha shtaka la kupokea kwa njia ya undanganyifu vipande 25,000 vya sabuni ya Jamaa vyenye thamani ya zaidi ya Sh3.3 milioni pamoja na kupokea pesa tasilimu Sh105,000 kutoka kwa mlalamishi Bi Emily Awino aliachiliwa kwa dhamana ya pesa taslimu Sh50,000.

Kesi itasikizwa Februari 23, 2018.