Magufuli: Mahakama iwe chanzo cha mapato

RAIS John Magufuli amewataka watumishi wa idara ya Mahakama kutanguliza maslahi ya Tanzania na wamtangulize Mungu wanapotoa uamuzi.

Rais pia ameitaka Mahakama iwe chanzo cha mapato ya nchi, ijitathimini na yafanyike mabadiliko.

Ametoa maagizo hayo leo jijini Dar es Salaam wakati anahutubia kwenye maadhimisho ya Siku ya Sheria nchini ikiwa mwanzo wa mwaka mpya wa Mahakama.

“Timizeni wajibu wenu, msiogope” amesema Rais Magufuli na kuahidi kufanyia kazi ombi la kuboresha maslahi ya watumishi wa Mahakama.

Rais amesema, anasikia mengi kuhusu yanayoendelea kwenye vyombo ya utoaji haki na anakerwa na kauli za ‘upelelezi unaendelea’ hata kwenye kesi ambazo ushahidi upo dhahiri.

“Lazima niseme kwa sababu nataka Tanzania kwanza, nataka nchi yetu iende salama…ni lazima tufanye transformation (mabadiliko) katika utoaji haki”amesema Rais Magufuli.