HII NI KALI YA MWAKA KWA YANGA

 Dar es Salaam. Hii kali, hicho ndicho unachoweza kusema wakati mashabiki wa Yanga walipoamua kuishangilia Azam ikiifunga Yanga mabao 2-1 na kuizima ndoto ya Simba kucheza mashindano ya Afrika mwakani.

Pamoja na mvua kubwa kunyesha na Uwanja kujaa maji kiasi cha wachezaji wa timu zote mbili kushindwa kuonyesha uwezo wao, Yanga ilipata bao la kuongoza kupitia kwa Andrey Coutinho, kabla ya Azam kusawazisha kupitia kwa Bryson Rafael na nahodha John Bocco aliingia akitokea benchi kupachika bao la ushindi.

Ushindi huo umeifanya Azam kufikisha pointi 48, ambazo haziwezi kufikiwa na Simba (44), hata kama itashinda mchezo wake wa mwisho dhidi ya JKT Ruvu. Kutokana na mvua Yanga walikabidhiwa kombe lao ndani. Kabla mechi haijaanza mashabiki wa Yanga walimiminikia uwanjani na kukaa jukwaa moja na wenzao wa Azam na kushangilia, huku jukwaa ambalo hukaliwa na mashabiki wa Simba lilikuwa na mashabiki wachache.

Saa 10:55 jioni, nderemo na vifijo vilitawala uwanjani baada ya kombe kutolewa uwanjani, lakini mashabiki wengi wa Yanga walikerwa na kitendo cha kombe hilo kuwekwa eneo lenye vitambaa vyekundu na vyeupe.

Baada ya tukio hilo, wachezaji wa Azam walitoka wa kwanza na kusimama mistari miwili kuwapa heshima wachezaji wa Yanga wakati wakiingia uwanjani.

Huku mvua ikinyesha, Yanga ilianza mpira kwa kasi na nusura ipate bao dakika ya tatu, wakati Himid Mao alipopiga pasi ya chini iliyonasa kwenye maji na kumkuta Ammis Tambwe aliyepiga krosi, lakini ilikosa mmaliziaji. Azam ilijibu mapigo dakika ya tano, wakati krosi ya Brian Majwega ilimpita kipa wa Yanga, Dida lakini ilikosa mmaliziaji.

Yanga ilipata bao la kuongoza dakika 12 kwa mpira wa adhabu uliopigwa na Coutinho na kumwacha kipa Mwadini Ally asijue la kufanya. Kabla ya bao hilo beki wa Azam, Mao alimchezea vibaya Tambwe nje kidogo ya eneo la 18, ndipo Mbrazili huyo alipoonyesha uwezo wake wa kupiga faulo iliyopita juu ya ukuta wa Azam.

Bao hilo la Yanga lilidumu kwa dakika moja tu, kabla ya Azam kusawazisha kupitia kwa chipukizi, Bryson Rafael aliyepokea pasi ndogo ya Domayo akiwa ndani ya eneo la 18 na kupiga shuti la chini lililompita Dida na kujaa wavuni.

Baada ya bao hilo mashabiki wa Yanga waliokuwa wamekaa jukwaa pamoja na wale wa Azam waliamua kurejea kwenye jukwaa lao, huku wakiimba nyimbo za kuikejeli Simba.

Kutokana na mvua kubwa na maji kujaa uwanjani mwamuzi Jacob Odongo aliwaita manahodha wa timu zote mbili na kukagua uwanja na kukubali kuendelea na kipindi cha pili.

Yanga ilikosa bao dakika 49, baada ya Aggrey Morris kuteleza akizuia mpira uliopigwa na Nizar uliomkuta Mrwanda, lakini shuti lake lilishindwa kulenga lango.

Azam ilimtoa Mwaikimba, Domayo na kuwaingiza Didier Kavumbagu na John Bocco, mabadiliko yaliyozaa matunda kwa matajiri hao wa Chamazi.