DC Arusha amfagilia aliyetangaza nia CCM

 Mkuu wa Wilaya ya Arusha, Christopher Kangoye na diwani wa Kata ya Terat jijini hapa, Julius Ole Sekeyan wamemfagilia mgombea ubunge kwa tiketi ya CCM Philleon Mollel kuwa ndiye kiongozi anayetakiwa katika Jiji la Arusha sasa.

Wakati Kangoye akisema kwamba Mollel maarufu kama Monaban amekuja kubadilisha maisha ya vijana wa Arusha, Ole Sekeyan amesema mgombea huyo ndiye chaguo la Mungu.

Viongozi hao walitoa kauli hizo mwishoni mwa wiki katika hafla ya uzinduzi wa Shule ya Msingi ya Losio iliyopo Kata ya Terat jijini Arusha ambako mtia nia huyo alichangia mabati 50 na matofali 1,000. Kangoye ambaye alialikwa kama mgeni rasmi katika tukio hilo alisema kwamba Mollel amekuja kubadilisha maisha ya vijana wa Arusha na kuwataka vijana kuacha kulalamika ovyo.

“Siyo mnamuona Monaban pale mnadhani amekuja hivi hivi? Umetumika ushawishi mkubwa sana huyu amekuja kubadilisha maisha ya vijana na vijana acheni kulalamika.

“Kamanda wa UVCCM ni nafasi kubwa sasa wewe kamanda ni lazima uonyeshe utawafanyia nini wananchi wa Arusha wewe na makamanda wenzako wa wilaya,” alisema Kangoye.

Hata hivyo, Ole Sekeya aliwataka wakazi wa Arusha kumwomba Mungu ili awape kiongozi bora atakayeshughulikia matatizo yao.

huku akimtaja Mollel kwamba ni aina ya kiongozi bora kwa kuwa anajitoa kusaidia wanyonge.

“Muda umefika wa watu kuona matokeo ya kazi yenu ya maombi,tumuombe Mungu safari atupe kiongozi bora huyu Phillemon ameanza kazi miaka mingi kusaidia umma mimi nilimfuata mwaka 2000 atusaidie kupaua kanisa la Pentecoste hakika Mungu ametuonyesha kiongozi mzuri naye ni Phillemon”alisema Ole Sekeyan.

Kwa upande wake Mollel alisema kuwa maendeleo yoyote ndani ya jamii husika huletwa na watu na watu wenyewe ndio sisi na kuwataka wakazi wa kata hiyo kuchangia shughuli za maendeleo.

Mollel,ambaye aliendesha zoezi la uchangiaji wa ujenzi wa shule hiyo alitangaza matokeo yake na kusema jumla ya kiasi cha sh,laki 5 na ahadi ya sh,7 milioni zilipatikana huku matofali 1000,bati 50,shamba nusu heka pamoja na mbuzi wawili na kondoo mmoja walipatikana.