TEF wapinga polisi kumfungulia mashtaka mwanahabari, wataka aachiwe huru

Jukwaa la Wahariri Tanzania (TEF) limepinga Jeshi la Polisi kumfungulia mashtaka ya kuandamana bila kibali mwandishi wa habari wa gazeti la Tanzania Daima,  Sitta Tuma

Taarifa iliyotolewa leo Alhamisi Agosti 9, 2018 na Kaimu Mwenyekiti wa TEF,  Deodatus Balile, imeeleza kustushwa na taarifa za kukamatwa na kupigwa kwa mwandishi huyo wakati akiwa kazini

Inaeleza kuwa jukwaa hilo halikubaliani ya polisi  kumfungulia mashtaka ya kuandamana bila kibali kwa sababu mwandishi huyo alikuwa kazini

“Mashtaka hayo yafutwe mara moja, Polisi wanapaswa kutambua na kuthamini kazi ya uandishi wa habari sawa na wao wanavyofanya kazi ya ulinzi na usalama kwani uandishi ni kazi sawa na kazi nyingine, ”imeeleza sehemu ya taarifa hiyo

“Tunawasihi polisi kumwachia huru mara moja. Tuma amekamatwa katika mazingira halali ya mwandishi kufanya kazi”.

Tuma alikuwa anapiga picha katika mkutano wa Chadema uliokuwa ukifanyika katika Kata ya Turwa, Wilayani Tarime , mkoani Mara

Taarifa hiyo inafafanua kifungu cha (7)(1)cha sheria ya huduma ya habari (MSA,2016) kinatambua taaluma ya uandishi habari na kinampa mwandishi haki na wajibu wa kukusanya, kuchakata na kuchapisha taarifa mbalimbali bila kizuizi

Polisi yawaachia mbunge Matiko, mwandishi

“Viongozi waandamizi wa polisi  mara kadhaa wamewaahidi waandishi wa habari kuwa wanaheshimu uhuru wa vyombo vya habari, waandishi wanapokuwa kazini , ila kwa mshangao tumeona Tuma akikamatwa kupigwa kinyama huko Tarime, ”imesema taarifa hiyo