ASKARI AVUNJIKA MIGUU VOTE BAADA YA KUPATA AJALI

Zikiwa zimepita siku chache tangu kamanda wa Polisi mkoa wa Arusha ,Charles Mkumbo apate ajali mbaya akitumia gari la Polisi ,askari wengine  watatu wa jeshi hilo mkoani Arusha wamejeruhiwa katika ajali iliyohusisha gari la polisi wakati wakisindikiza fedha za benki kuu.

Kaimu Kamanda wa polisi mkoa wa Arusha, Yusuph Ilembo alisema kuwa, ajali hiyo imetokea jana katika barabara  ya Arusha Moshi eneo la  Tengeru mkoani hapa,majira ya saa 9 :30 Alasiri wakati gari la Polisi likiwa kwenye msafara wakitokea jijini Arusha

Alisema kuwa,gari hilo la polisi lenye namba PT 1715 aina ya Land a cruse lilikuwa likiendeshwa na Askari PC Ismail na alipofika eneo la tukio aligongana  na Lori la mchanga aina ya Tipa na kusababisha askari polisi ambaye ndiye dereva kuvunjika miguu yote miwili na kuumia vibaya kichwani.

Kamanda Ilembo alisema kuwa, ajali hiyo ilisababisha pia majeraha kwa askari wengine wawili waliokuwa kwenye gari hilo, ambapo baada ya ajali hiyo dereva wa Lori alikimbia na jeshi la polisi linafanya msako zaidi katika kumtafuta ili achukuliwe hatua

Aidha aliongeza kuwa gari la Polisi limeharibika vibaya kutokana na ajali.hiyo.

Alisema kuwa, askari huyo amelazwa katika hospitali ya mkoa wa Mount Meru akiwa na hali mbaya na wanafanya taratibu za kumhamishia katika hospital ya rufaa ya Muhimbili jijini Dar es salaam  Kwa matibabu zaidi huku majeruhi  wengine wawili hali zao zikiendelea  vizuri.

Ajali huyo imekuwa wakati jeshi hilo bado likiwa na kumbukumbu ya kamanda wake RPC Mkumbo ambaye bado anauguza majeraha ya ajali iliyotokea eneo la Mdorii Babati wakati akitoka kumsindikiza IGP Siro ,na kumsababishia majeraha mbalimbali ambapo hali yake Kwa sasa inazidi kuimarika.
Mwisho