WIKI YA SHERIA KUANZA KESHO JANUARI 28.

Wananchi katika jiji la Arusha wamekaribishwa kushiriki kwenye maadhimisho ya wiki ya sheria nchini ambayo yanaanza kesho  Januari 28 mpaka januari tarehe 31 mwaka huu.

Naibu Msajili wa Mahakama Kuu Arusha Anjel-Rumisha amesema Uzinduzi wa wiki ya sheria unafanyika kesho kwa matembezi yatakayojumuisha watumishi wa Mahakama na wadau wote wa sheria pamoja na viongozi wa sekta mbalimbali; ambapo mgeni rasmi anatarajiwa kuwa mkuu wa mkoa wa Arusha Mrisho Gambo.

Amesema matembezi hayo yataanzia katika viwanja vya mahakama kuu Arusha hadi mahakama ya Mwanzo Arusha Mjini maarufu Maromboso; hivyo amewaomba wananchi kushiriki katika maandamano hayo ambayo yanatarajia kuanza saa moja na nusu asubuhi.

Rumisha ameongeza kuwa baada ya hapo watakuwa na wiki nzima ya kutoa elimu na kusikiliza wananchi; ambapo kutakuwa na banda katika mahakama ya mwanzo Arusha mjini ambapo hapo watakuwepo wataalamu mbalimbali wa masuala ya kisheria.