NASA yawataka mabalozi wakome kuingilia siasa za Kenya

Kiongozi wa chama cha Wiper Bw Kalonzo Musyoka alipokabidhiwa uta na mshale na jamii ya Akamba mjini Machakos Januari 19, 2018. 

VIONGOZI wa NASA wamewataka mabalozi wa mataifa ya Magharibi wakome kujihusisha na masuala ya Kenya, wakishikilia kuwa ni lazima wataapisha vinara wao, Raila Odinga na Kalonzo Musyoka.

Bw Musyoka, ambaye ni kinara wa Wiper, alisema Kenya haihitaji usaidizi kutoka kwa mabalozi hao na akamtaka Balozi wa Amerika, Robert Godec, akome kuingilia masuala ya nchi.

“Balozi wa Amerika kwanza anafaa kuileta pamoja nchi yake ambayo sasa inachukuliwa kuwa imesambaratika. Waamerika 

wanaandamana kila siku kwa sababu hawana imani na uongozi. Watu kote ulimwenguni wanalilia uhuru, ukweli na haki hali ambayo si tofauti hapa Kenya,” akasema.

Alimtaja Bw Godec kuwa ndumakuwili ambaye amekuwa akiegemea upande wa Jubilee huku akiwataka viongozi wa NASA wawe na subira.

Bw Musyoka alisisitiza kuwa yeye na Bw Odinga walishinda Uchaguzi Mkuu wa Agosti 8 2017 lakini wakaibiwa. 

“Tulishinda uchaguzi huo peupe lakini Mahakama ya Juu ilipoamuru Tume Huru ya Uchaguzi na Mipaka (IEBC) ifungue sava, Jubilee iliwatisha wakakataa kufungua. Kama wanaamini hatujashinda, basi waagize sava zifunguliwe ili ulimwengu ujue ni nani msema kweli,” akasema.

Wakizungumza wakati wa mkutano wa Bunge la Wananchi katika bustani ya Uhuru, katikati mwa mji wa Mombasa, Bw Odinga alisema viongozi wa Jubilee wanarudisha Wakenya siku za giza kwa kutaka kuongoza wao na kubadilisha katiba.

Alimshambulia Bw Kenyatta kwa hatua yake ya kuteua wakuu wa polisi akisema hiyo kinyume cha sheria.

“Wakenya wanafaa kuwakataa Uhuru na Ruto na wapinge mipango yao ya kutaka kuturidisha siku za nyuma. Sisi tunaenda Kanani nao wanataka kuturudisha Misri.”

Bw Odinga alisema NASA itafanya mikutano Suswa eneo la Narok, Migori na Kisii kabla ya kuelekea Nairobi katika sherehe ya kuapishwa kwake.

“Tuko na mwelekeo na safari hii ya Kanani. Tunaelekea huko na mutasikia tarumbeta ikilia wakati tunafika. Nia yetu inaendeshwa na Wakenya ndiposa tuko katika ziara hii,” akasema Bw Odinga.

Bw Kalonzo pia aliishambulia Jubilee kwa kishindwa kutimiza ahadi zake, ikiwemo elimu ya bure ya sekondari.

“Waliiga mipango yetu ambayo ilikuwa tumeipanga vilivyo na sasa wameshindwa kuitekeleza. Mmeona elimu ya bure nyinyi?” akauliza.

Lakini akizungumza wakati wa ibada katika Kanisa Katoliki la Magundu, Kaunti ya Tharaka-Nithi, Seneta Kithure Kindiki aliwakosoa viongozi hao wa NASA kwa kuwapotosha wafuasi wao.

Alisema Katiba ya Kenya inaeleza vyema jinsi mtu anavyoweza kuwa rais na kwamba mamlaka hayo hayawezi kuchukuliwa kwa nguvu.

“Hata kama Bw Odinga na Bw Musyoka watalishwa kiapo barabarani, wanajua vizuri kuwa hawana Ikulu wanakoweza kwenda. Kiapo hicho hakina msingi wowote,” akasema.