MSIMU WA KILIMO 2018/2019 WAZINDULIWA RASMI PWANI

Ben Komba/Pwani

Msimu mpya wa kilimo cha mpunga mwaka 2018/2019 umezinduliwa rasmi  katika halmashauri ya Chalinze, mkoa wa Pwani kuashiria kuanza rasmi kwa shughuli za kilimo.

Akizindua msimu wa kilimo katika skimu ya umwagiliaji ya kilimo cha Mpunga ushirika wa CHAURU, Mkuu wa mkoa wa Pwani, Mhandisi EVARIST NDIKILO amewataka wakulima katika mkoa huo kutumia kanuni za kilimo bora ili kupata mafanikio wanayoyatarajia.

Aidha amesisitiza kunyang’anywa mara moja heka 300  za ardhi zilizokuwa zinashikiliwa na mwekezaji wa Kichina GUO MINTANG kama ilivyoagizwa na aliyekuwa Naibu Waziri kilimo, uvuvi na mifugo, MH. WILLIAM OLE NASHA ili zitumike kwa kilimo katika msimu huu wa kilimo. 

Naye Mwenyekiti wa Ushirika huo, BW.SADALLAH CHACHA akizungumzia juu ya maandalizi waliyofanya katika msimu wa kilimo2018/2019 amesema wamejiandaa kikamilifu kwa kuweza kununua trekta mpya moja aina ya NEW HOLLAND yenye horse power 90.

Ameongeza kuwa kwa upande wa pembejeo wamejipanga wao kama wasimamizi wa ushirika huo kununua pembejeo hizo na kuwauzia wakulima katika skimu hiyo.