Mabalozi waunganisha nguvu na wasanii wa Tanzania kupiga vita ujangili.

Serikali imesema ujangili ni janga la taifa linalohitaji kila mtu aguswe moyo wake ili ashiriki katika kulitokomeza na kwamba itafanya kila linalowezekana kukabiliana na tatizo hilo ikiwemo kuimarisha mifumo ya uhifadhi.

Waziri wa maliasili na utalii Mhe.Lazaro Nyalandu ameyasema hayo jijini Dar es Salaam wakati akizindua kampeni mpya ya kupambana na ujangili, itakayotekelezwa kwa kushirikiana na asasi za kimataifa za Wildaid na African Wildlife Foundation,  pamoja na mabalozi wapya wa kampeni hiyo mwanamuziki Ali Kiba na Jacquiline Mengi ambapo amesema wizara yake itahakikisha vijana wanakuwa sehemu ya ulinzi wa rasilimali hiyo.

 

Wakizungumza katika uzinduzi huo uliohudhuriwa na watu mashuhuri akiwemo mabalozi wa Marekani na China, balozi wa mpango huo mwanamuziki Ali Kiba na miss Tanzania wa mwaka 2000 Jacquiline Mengi wamewahamasisha watanzania kushiriki kikamilifu katika kudhibiti ujangili ili kuwanusuru Tembo, na wanyama wengine walio katika hatari ya kuangamizwa.

 

Kwa upande wao baadhi ya viongozi wa dini waliohudhuria uzinduzi huo wamesema kuua wanyama kwa njia zisizostahili haikubaliki popote, kwani wanyama pia wana haki zao za kuishi na kuitaka serikali kuwa na mkakati wa muda mrefu ambao ni kuinua kizazi kitakachopenda wanyama na kuchukia ujangili.

 

Naye afisa mtendaji mkuu wa asasi ya Wildaid Bw. Peter Knights amesema kampeni ya kutokomeza ujangili itafanikiwa duniani iwapo nguvu kubwa itatumika kuwashughulikia wafanyabiashara haramu wa kati badala ya kushughulika na wanavijiji peke yake na kuongeza kuwa utafiti umeonyesha kuwa tanzania imepoteza tembo kwa asilimia 60.