Yanga itumie uungwana kumsaidia Msuva

 

TATHMINI iliyofanywa hivikaribuni inaonyeshwa kwamba Ligi Kuu ya Algeria ndiyo ligi inayolipa mishahara mikubwa barani Afrika ikifuatiwa na ya Afrika Kusini.

Ndiyo ligi ambazo hata klabu zimekuwa na mapato makubwa na wadhamini wengi jambo ambalo limekuwa likiwanufaisha mpaka wachezaji wa ndani na wale wa kigeni kwenye ligi hizo.

Ligi za DR Congo, Sudan, Tunisia, Mali, Morocco, Nigeria, Ghana, Angola, Zimbabwe na Ivory Coast zinatajwa kama Ligi ngumu na lakini inaelezwa kwamba klabu nyingi kwenye nchi hizo hazilipi vizuri kutokana na kuyumba kiuchumi.

Tukio linalozungumzwa na wadau wengi kwa sasa ni lile la Simon Msuva wa Yanga kutorokea Afrika Kusini kufanya majaribio kwenye klabu ya Bidvest Wits bila idhini ya klabu. Mchezaji huyo alifanya majaribio kwa siku kadhaa na sasa anasubiri majibu ingawa taarifa za awali zinadai kwamba amefuzu.

Kikanuni Wits wamefanya makosa kumfanyia majaribio Msuva bila ya kupata idhini ya maandishi kutoka Yanga. Kocha wa Yanga, Hans Pluijm anasema Msuva alimuomba ruhusa lakini uongozi unakana kwamba haukuwa na taarifa na umeanza mchakato wa kuishtaki Wits.

Lakini ukiangalia rekodi za miaka ya hivi karibuni, kumekuwa na utata pale mchezaji wa Yanga anapotaka kwenda kufanya majaribio au anapopata timu nje, Yanga wamekuwa wagumu kumuachia mchezaji kuondoka ndio maana baadhi yao wamekuwa wakifanya uamuzi wa kutoroka kama alivyofanya Msuva.

Hatuungi mkono alichofanya Msuva lakini ukiangalia Ivo Mapunda wakati yuko Yanga alitokewa na hali kama hiyo akaamua kutorokea St.Georges baadaye Jerry Tegete akapata dili naye akabaniwa ikayeyuka. Maoni yetu ni kwamba Msuva amefanya kosa lakini Yanga wakae chini wajadiliane jinsi ya kutatua hilo tatizo kwa masilahi ya klabu, mchezaji mwenyewe na Taifa kwa ujumla.

Mchezaji huyo kwa sasa yupo kwenye fomu na ndio wakati wake wakufanya mambo makubwa, Wits wakileta dau Yanga wajadiliane kiungwana wamuachie akatafute maisha Afrika Kusini.

Akienda kucheza kule timu ya Taifa itanufaika zaidi na huenda ndani ya kipindi kifupi akauzwa kwenye Ligi kubwa zaidi katika Mabara mengine. Mrisho Ngassa akifanya vizuri na Free na Msuva naye akiwa fiti itatusaidia kuongeza nguvu kwenye timu ya Taifa kwavile Afrika Kusini klabu zina mashindano mengi, hali ambayo inamuweka mchezaji kwenye hali nzuri zaidi tofauti na Tanzania kwenye Ligi moja tu.

Yanga isitamke dau la kukomoa au kukatisha tamaa, itumie uungwana ili kuokoa kipaji cha Msuva kwa vile nafasi zenyewe kwa mchezaji kuzipata kama hizo ni adimu na akienda akifanya vizuri anafungua njia pia kwa wengine kuiangalia ligi ya Tanzania.

Halafu ifike mahali klabu zetu na zenyewe zibadilike, zijenge mazingira ya urafiki na klabu nyingine za Afrika na Dunia na zijivunie kufanya biashara ya wachezaji pamoja na kubadilishana wataalamu kwavile dunia imekuwa kijiji na hakuna kisichowezekana.