KACHERO ADAI OLESABAYA ALIVAMIA DUKA,AKAIBA NA KUTEKA NYARA

ASKARI wa upelelezi, Konstable James (31), amedai mahakamani kwamba upelelezi  uliofanywa na kikosi cha makachero, ulibaini kwamba aliyekuwa Mkuu wa Wilaya ya Hai, Lengai Ole Sabaya na wenzake, walivamia duka la Mohamed Saad, kupiga, kuteka nyara na kuwaweka chini ya ulinzi watu waliokuwa Dukani hapo  Katika kesi hiyo ya jinai ya unyang’anyi wa kutumia silaha, mbali na Sabaya (34), wengine ni Sylvester Nyegu (26) na Daniel Mbura (38).

Hata hivyo, kabla ya kuanza kutoa ushahidi, washtakiwa walimkataa wakidai kwamba alikuwapo mahakamani akisikiliza ushahidi uliotolewa na mashahidi wengine lakini mahakama ilitupilia mbali madai hayo, hivyo kuendelea na ushahidi

Akiongozwa na Wakili Mkuu wa Serikali Tumaini Kweka, alidai kwamba ni mpelelezi katika Ofisi ya Upelelezi Mkuu wa Upelelezi Wilaya ya Arusha (OC-CID) na katika majukumu yake  kituoni hapo amefanya kazi kwa miaka 10

James Alidai kwamba Februari 10, mwaka huu, mlalamikaji Bakari Msangi, alifungua jadala kituoni kuhusu tukio la shambulio la kudhuru mwili

Askari huyo alidai kuwa alikuwa miongoni wa wapelelezi katika shauri hilo na alikabidhiwa jalada kutoka kwa OC-CID, Gwakisa Minga, Machi 12, mwaka huu, kuanza kupeleleza

Konstebo James alidai kuwa alianza kazi hiyo majira ya saa 11 jioni akiwa ameambatana na OC-CID na makachero wengine pamoja na Numan Jasin kwenda kufanya upelelezi katika duka hilo

Tulipofika katika eneo hilo, Numan alifungua duka kwa ajili ya sisi kuanza kufanya upelelezi wa tukio hilo na wakati tukingia dukani tulikuta vitu vikiwa vimesambaratika na pembeni ya kaunta kulikuwa na majimaji na matone ya damu yaliyoganda

"Nilimuuliza Numan kwamba maji yale yalitoka wapi akatueleza kwamba mmoja wa vijana waliokuwa dukani alijikojolea. Pia wakati tukikagua kutaka kupata uhalisia wa tukio hilo kwenye CCTV camera, tulibaini kamera nne ‘footage’ zilichezewa," alidai.

Pia alidai kwamba wakati wakimhoji Numan, aliwaeleza kwamba Sabaya na walinzi wake waliwashambulia kwa kuwapiga ngumi, mateke na vibao ndipo walibaini kwamba kuna kitendo cha kijinai kilifanyika dukani hapo

"Watu waliopigwa kwenye tukio ni Hajirini Saada, Numan Jasin na Bakari Msangi na kwa mujibu wa mhanga (mwathirika) wa tukio hilo, walipigwa na walinzi wa Sabaya wakishinikizwa kuambiwa sehemu alipokuwa mmiliki wa duka," alidai.

Pia alidai kwamba walibaini kamera hizo zilichezewa kwa kugeuzwa kwa kuwa baada ya kuwahoji wahusika waliwaeleza kwamba kamera hizo hazikuwa katika mwelekeo wake wa siku zote

"Katika ukachero wangu kamera hizo hazikuweza kutusaidia katika upelelezi wetu kwa sababu zilikuwa zimechezewa, hivyo tukatafuta ushahidi mwingine

"Katika upelelezi wangu tulihoji mashuhuda wa tukio hilo na baada ya kuwahoji waliandika maelezo wakieleza Februari 9, mwaka huu, majira ya saa 11:00 jioni, walishuhudia magari tatu yakifika katika eneo la duka hilo na walishuka kwenye watu wapatao 10,  akiwamo Mkuu wa Wilaya ya Hai, Lengai Ole Sabaya, na waliingia ndani na baadhi walibaki nje na mlango wa duka ulifungwa nusu

"Mashuhuda hao walishudia baadhi watu watatu waliokuwa nje  walikuwa wameshika  bastola na bunduki kubwa," alidai.

Kadhalika, alidai kwamba Bakari Msangi alipokwenda Hospitali ya Mount Meru kutibiwa, alipigwa picha za mnato mtaalamu wao akiwa na majeraha na walizituma katika Kamisheni ya Uchunguzi wa Kisayansi (CFB), iliyoko Dar es Salaam kwa ajili ya upelelezi zaidi

Alidai kwamba walipiga picha tano kama sehemu ya kukamilisha ushahidi na kuithibitishia mahakama kuwa mhanga huyo alipigwa na kushambuliwa

Shahidi huyo aliwasilisha mahakamani picha tano za mnato na barua kutoka CFB, ikionyesha kwamba picha hizo zimefanyiwa kazi katika kamisheni hiyo

"Baada ya kupokea majibu hayo nilihakiki picha kama ni zenyewe na niliziambatanisha katika jalada ya mashtaka," alidai.