MKE WA NYALANDU ASHANGAA "MUME WANGU HAKUWA ANATOROKA"

Faraja Kota, mke wa waziri wa zamani wa Maliasili na Utalii, Lazaro Nyalandu, amezungumzia suala la mumewe kuzuia kuingia Kenya akisema mwanasiasa huyo hakuwa na mpango wa kuvuka mpaka kwenda nchini humo bali alikuwa kwenye biashara zake.

Taarifa za kuzuiwa kwa Nyalandu zilitolewa jana na Novemba 9 na Mkuu wa Wilaya ya Longido, Frank Mwaisumbe akisema mwanasiasa huyo alikuwa akitaka kuondoka nchini bila kuwa na nyaraka zinazohitajika.

Alisema maofisa uhamiaji walimzuia kutoka nchini kutokana na kukosa nyaraka zikiwemo za gari na kumtaka aache gari hapo mpakani, avifuate vinginevyo watamfikisha mahakamani.

Hata hivyo, akiandika katika ukurasa wake wa Twitter, Faraja amesema mume wake hakuwa akivuka mpaka kwenda Kenya.

“Hapana, mume wangu hakuwa anajaribu kuvuka mpaka kwenda Kenya. Hakuhitaji pasi kuwa Namanga kwa ajili ya biashara zake binafsi upande wa Tanzania mchana kweupe. Tunaishi Arusha. Mungu wangu. Jambo lenyewe halikutokea jana (Jumatatu) kama ilivyoripotiwa, ni tangu Ijumaa wiki iliyopita,” ameandika Faraja.

Amewashukuru watu waliojitokeza na kumjulia hali katika ujumbe huo wakiwemo makada wa vyama vya upinzani.

 “Kuna maumivu tunayotakiwa kuponya. Sina nguvu ya kuwa na hasira. Ninaamini tutapata amani, umoja na huruma kama Taifa. Mungu aibariki nchi yetu Tanzania.”