Raisi Magufuli ampa Maagioz CAG Mpya "Usiende huko ukajifanya na wewe ni mhimili/ Nenda ukachape kazi"

Siku moja baada ya Rais John Magufuli wa Tanzania kumteua Mdhibiti na Mkaguzi Mkuu wa Hesabu za Serikali (CAG), Charles Kichere, amempa ujumbe mzito muda mfupi baada ya kumwapisha.

Rais Magufuli amemkumbusha CAG Kichere kiapo chake na kumsisitiza kutelekeza maagizo atakayopewa na mihimili mingine.

Ameyasema hayo leo Jumatatu, Novemba 4, 2019 wakati akiwaapisha wateule wake Ikulu jijini Dar es Salaam.

“Usiende huko ukajifanya na wewe ni mhimili, mihimili ni mitatu pekee na umeiona hapa. Nafasi yako ni mkaguzi mkuu wa Serikali, kwa hiyo mwenye Serikali yupo, kafanye kazi zako vizuri bila kuonea watu,” amesema.

Amesema, “Unapopewa kazi na mihimili mingine kama Bunge au Mahakama kaitekeleze usibishane nao wewe ni mtumishi. 

Kasimamie hiyo ofisi kuna baadhi ya watendaji wako wanapokwenda kukagua kwenye balozi wanaomba fedha, sasa nenda kawachambue.”

“Ofisi ya CAG sio clean (safi) kama mnavyofikiria, sasa nenda kachambue ukapange positions (nafasi) za watu wako, ili mauchafu (uchafu) haya ukayasafishe.

“Una heshima umetolewa kwenye Ukamishna wa TRA (Mamlaka ya Mapato Tanzania) hukusema neno ukaenda kufanya kazi huko, wapo wengine ukiwateua utadhani nafasi zao unampa UDC (Ukuu wa Wilaya) ukimtoa anaanza kulalamika,” amesema Rais Magufuli.

  “Nenda ukachape kazi, katika maisha ya duniani huwezi kupewa mamlaka ya kuteua halafu usiwe na mamlaka ya kutengua, ukishindwa hivyo huwezi kuwa Rais. Mwenzako aliyekuwepo amemaliza muda wake leo, kwa hiyo kesho uende ofisini ukaanze kazi, kayatoe mauchafu yote utakayoyakuta mengine waulize Wizara ya Fedha wanayafahamu,” amesema Rais.