Vigogo KNCU, TCCCo kuendelea kusota mahabusu

Vigogo wa taasisi mbili za Ushirika mkoani Kilimanjaro, wanaokabiliwa na kesi mbili za uhujumu uchumi, wataendelea kusota mahabusu huku mmoja akikodi wakili kwa ajili ya kumtetea

Vigogo hao wa Chama Kikuu cha Wakulima wa Kahawa mkoa Kilimanjaro (KNCU) na kiwanda cha kukoboa kahawa Tanganyika (TCCCo), wataendelea kukaa rumande hadi Agosti 7.

Mwenyekiti wa zamani wa KNCU, Aloyce Kitau ambaye alipofikishwa mahakamani kwa mara ya kwanza Julai 9, 2018 hakuwa na wakili, sasa amemkodi wakili Elikunda Kipoko kumtetea

Hayo yamebainika leo Jumanne Julai 24, 2018  wakati kesi hiyo ilipotajwa mbele ya Hakimu Mkazi Moshi, Pamela Mazengo na wakili wa Serikali mwandamizi, Tamari Mndeme kueleza kuwa upelelezi wa kesi hizo haujakamilika

Wanaoshitakiwa pamoja na Kitau ni aliyekuwa makamu mwenyekiti wa KNCU, Hatibu Mwanga anayetetewa na wakili Sawayael Shoo na Meneja mkuu, Honest Temba anayetetewa na wakili Jullius Semali

Watuhumiwa hao wanadaiwa kuwa kati ya Julai 2014 na Novemba 2017, kwa pamoja walitumia vibaya madaraka yao wakiwa viongozi wa KNCU na kuisababishia KNCU, hasara ya Sh2.9 bilioni

Katika shitaka la pili, upande wa mashitaka unadai katika kipindi hicho, washitakiwa kwa matendo ya makusudi, waliilipa kampuni ya Oceanic Link kiasi hicho cha fedha na kuisababishia KNCU hasara ya Sh2.9 bilioni

Mbali na kesi hiyo, jana walifikishwa kortini kwa mara ya pili, aliyekuwa Mwenyekiti wa Bodi ya TCCCo, Maynard Swai na Meneja mkuu wake, Andrew Kleruu wanaokabiliwa na mashitaka ya uhujumu uchumi.

 Swai na Kleruu, wanaotetewa na wakili Kipoko wakili, wanadaiwa kuwa kati ya Januari 2014 na Desemba 2015, walitumia vibaya madaraka yao na kununua mtambo wa kukoboa kahawa bila kufuata taratibu

Upande wa mashitaka unadai kuwa watuhumiwa  walinunua mtambo wa kukoboa kahawa kutoka kampuni ya Brazafric ya Brazil bila kufuata taratibu na kuisababishia TCCCo hasara ya Sh1.67 bilioni

Kama ilivyokuwa katika kesi ya vigogo wa KNCU, wakili mwandamizi wa Serikali, Tamari Mndeme aliomba tarehe nyingine ya kutajwa kwa kesi hiyo kwa kuwa upelelezi wa shauri hilo haujakamilika

Hakimu mkazi wa Moshi,Pamela Mazengo aliahirisha kesi hiyo hadi Agosti 7 mwaka huu na kuamuru washitakiwa wote waendelee kusota rumande katika gereza kuu la Karanga mjini Moshi