Raisi Magufuli Atuma salamu za pongezi kwa Raisi wa Msumbiji

Rais wa Jamhuri ya Muungano wa Tanzania Mhe. Dkt. John Pombe Magufuli ametuma salamu za pongezi kwa Rais wa Jamhuri ya Msumbiji Mhe. Filipe Jacinto Nyusi, wanachama wa chama cha FRELIMO na wananchi wote wa Msumbiji ambao kesho tarehe 25 Julai, 2018 wanaadhimisha miaka 50 ya Mkutano wa Pili wa FRELIMO

Pamoja na salamu hizo Mhe. Rais Magufuli amemtuma Rais Mstaafu wa Awamu ya Tatu Mhe. Benjamin William Mkapa na Makamu Mwenyekiti wa Chama Cha Mapinduzi (CCM)-Bara Ndg. Philip Japhet Mangula kumwakilisha katika sherehe za maadhimisho hayo zitakazofanyika Matchedje katika jimbo la Niassa.

Katika salamu hizo Mhe. Rais Magufuli amewatakia heri wananchi wote wa Msumbiji na kuwapongeza kwa mafanikio waliyoyapata ikiwemo kudumisha uhuru wao, na kwamba Tanzania inajivunia uhusiano wa kidugu, kihistoria na ujirani mwema na nchi hiyo

“Kwa niaba ya Serikali ya Jamhuri ya Muungano wa Tanzania, CCM na Watanzania wote naungana nawe Mhe. Rais Nyusi na wananchi wote wa Msumbiji katika kusherehekea siku hii muhimu, siku hii inatukumbusha jukumu muhimu tulilonalo la kuulinda na kuutetea uhuru ambao waasisi wa Mataifa yetu yaani Hayati Mwl. Julius Kambarage Nyerere wa Tanzania na Hayati Samora Moises Machel wa Msumbiji waliupigania” amesema Mhe. Rais Magufuli

Amemhakikishia Mhe. Rais Nyusi kuwa Tanzania itaendelea kudumisha na kukuza uhusiano wake na Msumbiji katika ngazi ya Serikali na vyama vya CCM na FRELIMO, na pia kuimarisha ushirikiano hasa katika masuala ya uchumi

Aidha, Mhe. Rais Magufuli ametoa wito kwa wananchi wa Tanzania na Msumbiji kuendelea kutumia fursa za maendeleo zilizopo na kudumisha udugu wao.