Vigogo Chadema kusomewa maelezo ya awali Julai 31

Mahakama ya Hakimu Mkazi Kisutu Julai 31, 2018 itawasomea maelezo ya awali viongozi tisa wa Chadema akiwemo mwenyekiti wa chama hicho, Freeman Mbowe

Hayo yameelezwa leo Jumatano Julai 25, 2018 na hakimu mkazi mkuu wa mahakama hiyo, Wilbard Mashauri ambaye pia ameutaka  upande wa utetezi ukiongozwa na wakili Nashon Nkungu kwamba ukiwa na hoja ya kutaka kesi hiyo iahirishwe kwa muda mrefu, uziwasilishe

Uamuzi huo umetolewa baada ya wakili wa Serikali Mkuu, Faraja Nchimbi kuieleza mahakama kuwa kesi ilipangwa kwa ajili ya kutajwa

Nchimbi ameifahamisha mahakama hiyo kuwa Julai 20, 2018 Mahakama Kuu ilitoa uamuzi wake katika maombi ya marejeo namba 126 /2018 yaliyowasilishwa na washtakiwa kwa kuyatupilia mbali kwa sababu yalikosa vigezo vya kisheria na pia iliona maombi hayo yalikuwa ni batili

Kutokana na mazingira hayo, ameiomba mahakama kuipangia kesi hiyo tarehe nyingine ya usikilizwaji wa maelezo ya awali, baada ya hapo ipange tarehe ya kuanza kusikilizwa mfululizo kwa ushahidi wa mashahidi wa upande wa mashtaka.

Wakili Nkungu kwa niaba ya wakili Peter Kibatala na Jeremiah Mtobesya ameitaarifu mahakama hiyo kuwa Julai 20, 2018 Mahakama Kuu iliyatupilia mbali maombi ya marejeo namba 126/2018 na kwamba baada ya uamuzi huo walionyesha nia ya kukata rufaa na wameshapeleka kusudio la kukata rufaa  Mahakama Kuu siku hiyo hiyo

Baada ya Nkungu kueleza hayo, Wakili Nchimbi amedai amesikia hoja lakini kwa kuwa hazijawekwa katika kumbukumbu za mahakama ameomba kesi ipangiwe tarehe nyingine

Hakimu Mashauri baada ya kusikiliza hoja za upande zote ameahirisha kesi hiyo hadi Julai 31, 2018

Hata hivyo, wakati kesi hiyo inaendelea washtakiwa Mbowe na Katibu Mkuu wa chama hicho, Dk Vicent Mashinji hawakuwepo mahakamani baada ya kupata hudhuru

Washtakiwa waliokuwepo mahakamani leo ni naibu makatibu wakuu, John Mnyika (Bara) na Salum Mwalimu (Zanzibar),  mbunge wa Tarime Vijijini, John Heche; mbunge wa  Kawe, Halima Mdee; mbunge wa Bunda Mjini, Ester Bulaya

Wengine ni mbunge wa Iringa Mjini, Mchungaji Peter Msigwa na mbunge wa Tarime Mjini, Esther Matiko

Washtakiwa hao kwa pamoja wanakabiliwa na mashtaka 13, ikiwemo kula njama, kufanya mkusanyiko wenye ghasia, kuhamasisha hisia za chuki, kushawishi hali ya kutoridhika, uchochezi na kushawishi utendaji wa kosa la jinai kati ya Februari Mosi na 16, 2018 jijini  Dar es Salaam