Shule ya Sekondari ya Wasichana Kujengwa Wilayani Ngorongoro

Wilaya ya Ngorongoro Mkoani Arusha imendelea kuboreka kwenye masuala ya Elimu baada ya miradi ya Elimu yenye Garama ya zaidi ya shilingi bilioni 3 kuletwa kwa kipindi cha miaka miwili na Nusu na katika Fedha Hizo sh Bilioni 1 zitajenga Shule ya sekondari ya wasichana katika kata ya Laitole Wilayani Humo.

Hayo yamesemwa na Mbunge wa Jimbo la Ngorongoro ambaye pia ni Naibu waziri wa Elimu sayansi na Teknolojia Mh William Olenasha wakati akizungumza na wananchi wa kata ya Esere katika muendelezo wa Ziara yake ya kutembelea wananchi ili kuwaeleza mafanikio aliyoyapata tangu alipopata nafasi ya kuongoza wananchi wa Jimbo la Ngorongoro.

Olenasha ambaye tangu amechaguliwa na wananchi wa jimbo lake kwa miaka miwili na nusu amefanikiwa kuboresha Elimu na mpaka sasa kwa kipindi hicho shule za Msingi 6 zimejengwa na Sekondari Tatu ambapo ni juhudi hizo ni kati yake na wananchi waliomchagua pamoja na ushirikiano wa Serikali ya Raisi Dokta John Magufuli .

Olenasha ambaye tangu ameanza ziara hiyo ametembelea jumla ya kata 13 za jimbo lake amesema kuwa tayari eneo la kujenga shule limeshapatikana na wataalamu wa halmashauri wanaoshughulika na masuala ya Ardhi wameshaagizwa kwenda kupima eneo hilo na ujenzi utaanza hivi karibuni.

Amesema kuwa Elimu ya mtoto wa kike itakuwa bora zaidi kwasababu kilio cha mtoto wa kike kuendelea na masomo kitakua kimesikika. 

“Kilio cha watoto wa kike ambao hawaendelei kwenye shule ngazi za juu kimesikika sasa Ngorongoro siku hizi ndiyo vijana wanasoma lakini watoto wa kike wamebaki nyuma tumeona kwamba tuwaanzishie shule maalum ambayo ni ya wasichana na na mmebahatika shule hiyo kiwilaya hiyo itakuwa kata ya Laitole Kijiji cha Esere”Amesema Olenasha

Olenasha amesisitiza kuwa mradi huo ni wa pekee kuja katika kata hiyo ya Laitole hivyo ni vizuri wananchi wakasimamia vizuri kwa kushirikiana pindi mradi huo utakapoanza kwa ajili ya manufaa ya watoto ili kupata wasomi wa baadae kwasababu mabadiliko makubwa yanakuja.

Mosses Lekui mwananchi wa Wilaya ya Ngorongoro amesema kuwa uwepo wa shule hiyo ya sekondari ya wasichana itakayoanza kujengwa hivi karibuni itasaidia jamii ya kifugaji kupeleka watoto wa kike shule na kupata elimu bora ya maisha yao ya baadae.

Amesema wanafunzi wanatembea umbali mrefu kufuata shule za sekondari baada ya kumaliza darasa la saba lakini ujio wa mradi huo utawapunguzia hata wao garama za kuwapeleka watoto wa kike shule za mikoa ya mbali ambapo pia ni garama kubwa.

Awali Mbunge wa Ngorongoro Mh William Olenasha akiwa ameongozana na katibu wa Bunge walifika Eneo litakalojengwa Shule hiyo ya Sekondari ya wasichana ambayo itasaidi kwa kiasi kikubwa watoto wa kike kuendelea na masomo yao.