Kinachofuata waliohukumiwa kwa kumuua bilionea Msuya

Watu watano wamehukumiwa kunyongwa mapema wiki hii baada ya kupatikana na hatia ya kumuua mfanyabiashara tajiri wa Mirerani, Erasto Msuya

Je, wajua kinachofuata baada ya hukumu hiyo? Ni hukumu kutekelezwa?

Pengine hujawahi kufikiria ni nini hufuata na pengine unaweza kuwa mmoja wanaoamini kuwa kinachofuata ni utekelezaji wa hukumu

Katika mahojiano na Mwananchi yaliyofanyika Juni 28, Jaji mstaafu Thomas Mihayo alieleza umuhimu wa hukumu za aina hiyo kubaki kwenye sheria, akisema kuna mauaji mengine yanatia uchungu na pia kuzungumzia mambo mengine yanayoendelea katika nyanja ya sheria nchini

Pia akaeleza nini hufuata baada ya mahakama kuhukumu kifo. Alisema mtu anapohukumiwa kunyongwa hadi kufa, Rais ndiye anayesaini utekelezwaji wa hukumu hiyo

“Lakini kunakuwa na automatic appeal (rufaa ya moja kwa moja bila ya mtuhumiwa kuomba),” alisema Jaji Mihayo

Alisema baada ya hapo kamati maalumu inakuwapo kwa ajili ya kuangalia mwenendo wa maisha ya nyuma ya aliyehukumiwa ili kumshauri jaji aliyetoa hukumu aone nini kifanyike

“Kamati hiyo inakuwa na baadhi ya viongozi wa juu wa ulinzi na usalama ili kuona kama inaweza kumshauri jaji abadili uamuzi wake, lakini akiona haifai anasema acha sheria ichukue mkondo wake,” alisema Jaji Mihayo

Wakili wa kujitegemea John Mallya alisema iwapo jaji atasimamia uamuzi wake, basi hukumu hiyo itapelekwa kwa Rais kwa ajili ya kusainiwa ili adhabu ya kunyongwa iweze kutimizwa

Mallya alisema Rais akisaini, hukumu hupelekwa kwa mnyongaji wa Taifa kwa ajili ya kutekeleza kilichoamuliwa.

 “Yeye atapanga siku gani ya kunyonga na anatakiwa amtaarifu mnyongwaji siku 90 kabla ya kutekeleza adhabu hiyo,” alisema

Alisema baada ya mnyongwaji kupewa taarifa, ana haki ya kusema kile anachotaka kabla ya siku hiyo kufika

“Ana haki ya kusema kama anahitaji kiongozi wake wa dini kwa ajili ya kutubu dhambi, au aitiwe ndugu zake au chochote,” alisema

Alisema siku ikifika aliyehukumiwa hunyongwa kwa kutumia kitanzi hadi anakufa

“Akishakufa ndugu watataarifiwa waje kuchukua mwili kwa ajili ya kuzika au vinginevyo itakavyokuwa,” alisema Mallya

Hata hivyo, pamoja na adhabu hiyo kuwapo nchini, marais wamekuwa hawasaini hukumu hizo, akiwamo wa sasa Dk John Magufuli ambaye hivi karibuni aliamua kuwasamehe wafungwa 61 waliokuwa wakitumikia adhabu hiyo

Hata hivyo, Jaji Mihayo alisema kutotekelezwa kwa adhabu ya kifo si sababu ya kuitoa kwenye sheria

“Kuna marais ambao hawapendi kutoa adhabu hiyo hivyo si lazima,” alisema

“Lakini kunawaumiza wafungwa wa adhabu hiyo (kwa kuwa) wanakaa muda mrefu kusubiri na ndiyo maana Rais wa sasa ameamua kuwasamehe kwa kuwa wanateseka kuwa na ile adhabu kichwani.”

Jaji huyo mstaafu alisema Rais anaweza kusamehe adhabu yoyote inayotolewa na ndiyo maana wakati mwingine anaweza kupunguza ile ya kunyongwa na kuwa ya kutumikia kifungo cha maisha jela