Familia yataka Serikali kueleza nani alimuua Akwilina

Baada ya kamanda wa Polisi Kanda Maalumu ya Dar es Salaam, Lazaro Mambosasa kusema askari waliotuhumiwa kumuua kwa risasi aliyekuwa mwanafunzi wa Chuo cha Taifa cha Usafirishaji (NIT), Akwilina Akwilini wameachiwa huru, familia ya binti huyo imeitaka Serikali iwaambie ni akina nani walihusika na mauaji hayo

Richard Akwilini, kaka wa Akwilina akizungumza na Mwananchi jana, alisema kwa kuwa jukumu lote kuhusu tukio la kuuawa mwanafunzi huyo lilibebwa na Serikali wanataka kusikia tamko kutoka kwao ni nani alihusika

“Tumesikia kwenye vyombo vya habari askari waliotuhumiwa kumuua ndugu yetu wameachia huru, ni sawa. Lakini familia tunataka kujua ni nani aliyekuwa amebeba silaha iliyomuua ndugu yetu?” alihoji Richard

Dismas Shirima, msemaji wa familia ya Akwilini alisema wakati wa tukio la mauaji Rais John Magufuli alieleza kusikitishwa na kitendo hicho, hivyo wanasubiri tamko na busara kutoka kwake kwa sababu Serikali ilibeba jukumu la suala hilo

“Tunaamini baada ya askari kuachiwa Rais Magufuli atasema jambo na tunajua atatenda haki ili kujua ukweli uko wapi. Tunachosubiri kutoka kwake ni busara zake kama Rais wa wanyonge ili jambo hili litendewe haki,” alisema Shirima.

 Akwilina aliuawa kwa kupigwa risasi Februari 16, akiwa kwenye daladala eneo la Kinondoni Mkwajuni jijini Dar es Salaam akitokea Mabibo wakati askari wakiwatawanya wafuasi wa Chadema waliokuwa wakielekea ofisi ya mkurugenzi mtendaji wa Halmashauri ya Kinondoni

Akizungumza na waandishi wa habari Jumanne wiki hii, Kamanda Mambosasa alisema askari waliokuwa wanashikiliwa kutokana na tukio za mauaji ya mwanafunzi huyo waliachiwa baada ya ushahidi kuwa hafifu

Akielezea tukio hilo, kamanda huyo aliwatuhumu Chadema kwa kuhamasisha maandamano ya kisiasa yaliyofanyika Februari 16, siku moja kabla ya uchaguzi mdogo wa ubunge Jimbo la Kinondoni

Kauli hiyo ilijibiwa na mwenyekiti wa Baraza la Vijana Chadema (Bavicha), Patrick ole Sosopi aliyesema inalenga kuwaaminisha wananchi kuwa shughuli za chama chao ni hatari na si salama kwa watu kuhudhuria