Kigwangalla awaomba wanasiasa kufanyakazi za kumsaidia Rais kudhibiti mifugo hifadhini

Waziri wa Maliasili na Utalii, Dk Hamis Kigwangalla amewaomba wanasiasa wenzake, kufanyakazi ya kumsaidia Rais John Magufuli, kudhibiti mifugo kuingia hifadhini badala ya kutetea uvamizi huo

Akizungumza na waandishi wa habari, katika eneo la hifadhi ya jamii ya Makao, Dk Kigwangalla amesema changamoto  katika uhifadhi kwa sasa ni mifugo, hivyo yeye na wanasiasa na viongozi wa Serikali waliochaguliwa wanapaswa kusimamia sheria za nchi kutokana na nafasi zao walizoteuliwa kumsaidia Rais Magufuli

Amesema maeneo mengi ya hifadhi yamevamia kuna watu wanajenga hadi katika ndani ya eneo la mita 500 kutoka mpaka wa hifadhi na hao mara nyingi ndio wanaingiza mifugo hifadhini usiku na kufanya ujangili

Waziri huyo, pia alitembelea kambi ya kitalii ya TGTS na hoteli ya Mwiba na kushuhudia vikosi vya kupambana na ujangili katika maeneo hayo ambavyo vipo hapo chini ya Taasisi Friedkin Conservation Fund na kueleza kuridhishwa na uwekezaji wa taasisi hiyo

Mkurugenzi wa Mwiba Holding, Abdukaril Mohamed, amesema katika eneo la Mwiba wamewekeza Sh2.2 bilioni na hivi sasa wanaendelea na shughuli za uhifadhi na utalii

"Mheshimiwa Waziri (Kigwangalla) katika eneo hili, kampuni yetu inafanya utalii wa picha na kuna hoteli, tunafanyakazi kwa amani na utulivu na vijijini vinavyotuzunguka," amesema

Mwenyekiti wa kijiji cha makao, Anthony Philip, alimweleza Waziri Kigwangalla kuwa, katika eneo hilo kuna mahusiano mazuri baina ya vijiji na wawekezaji na vijiji vinapata mgao wa fedha

Amesema kijiji cha makao kimekuwa kikipata zaidi ya Sh147 milioni kwa mwaka kutoka kwa mwekezaji na vijiji vingine sita vimekuwa vikipata zaidi ya Sh80,000 milioni kila mwaka

Akiwa katika pori la akiba la Maswa, Meneja wa pori hilo, Lusato Masinde amesema wanauhusiano mzuri na wawekezaji ambao licha ya kulipia ada za vitalu pia wamekuwa wakitoa msaada wa huduma mbalimbali ikiwepo maji

Hata hivyo, amesema katika pori hilo changamoto kubwa ni uvamizi wa mifugo, uchache wa watumishi na upungufu wa vitendea kazi