Mbunge wa Longido Dkt Steven Kiruswa Amuahidi mambo muhimu Mbunge Mstaafu Lekule Laizer

Mbunge wa jimbo la Longido mkoani Arusha Dkt Steven Kiruswa amempongeza Mbunge mtaafu Bwana Lekule Laizer ambaye aliongoza jimbo hilo kwa miaka 20 na kumuahidi kuwa yale yote mema aliyoyanzisha katika kipindi cha uongozi wake atayaendeleza.

Dkt Kiruswa ameyasema hayo katika sherehe ya kustaafu kwa Mh Lekule ambapo zilifanyika nyumbani kwake Mundarara ambapo walishiriki viongozi wa kitaifa akiwemo naibu waziri wa elimu sayansi na Teknolojia Mh William Olenasha , Mkuu wa mkoa wa Njombe Christopher Olesendeka ,mwenyekiti wa CCM mkoa wa Arusha Loata Sanare ,Viongozi wa wilaya na kata pamoja na wananchi.

Mbunge Dkt Kiruswa amesema kitendo kilichofanyika siyo sherehe tu bali ni kama tuzo ya kumpongeza Mh Lekule kwa kazi nzuri aliyofanya wakati akiwa Mbunge wa jimbo hilo ambapo kuna mengi aliyoyafanya ikiwemo kutetea ardhi ya wananchi wa Longido.

Amesema kati ya mambo ambayo ataendeleza ni pamoja na ulinzi ardhi kwa kuwa moja ya migogoro iliyokuwemo kipindi cha nyuma ni wananchi kupambania ardhi  hivyo atahakikisha anaendelea kulinda na kusimamia ardhi ya Longido.

Pamoja na hayo Dkt Kirushwa ameongeza kuwa vile vile atahakikisha anasimamia masuala ya upatikanaji wa maji kwa wananchi kwa kipindi chote ambapo miradi mbalimbali inaendelea kuboreshwa zaidi ambapo Mh Lekule alianzisha kupambania huduma ya upatikanaji wa maji.

Kwa upande wa elimu amesema pia atahakikisha anahamasisha jamii za kifugaji kupeleka watoto shule kwa kuwa Lekule aliboresha upatikanaji wa elimu pia ameahidi kuendeleza jambo ili wilaya hiyo ya Longido iwe na wasomi zaidi.

Amesisitiza kuwa upo mfuko ambao mbunge huyo Mstaafu mzee Lekule alianzisha kwa ajili ya watoto kwenda shule za msingi na sekondari amesema yeye ataboresha zaidi ili watoto wafike Vyuo vikuu ili wapatikane wataalamu wa  Masomo ya Sayansi,Madaktari pamoja na wataalamu wa fani mbalimbali.

Hata hivyo Kiruswa amesema yuko tayari kutumikia wananchi wake kwa nguvu zote na wandelee kumtuma kwasababu tayari wamempa ridhaa ya kuwatumikia kama Mbunge wao.

Awali akitoa wosia Mbunge Mstaafu Mh Lekule amesema hana wasiwasi na Dkt Kiruswa kwa kuwa ni Mbunge msikivu na hana majivuno anajali wananchi wake na kuahidi kumpa ushirikiano wowote atakaotaka kutoka kwake.

Mzee Lekule pia amemtaka Kiruswa kukumbuka kuwa kwenye uongozi kuna changamoto nyingi ambazo zina katisha tama lakini aendelee kuvumilia kwasababu anaweza kuongoza ndiyo mana akapewa dhamana hiyo ya kuongoza wananchi bila kujali itikadi zao za vyama.

Sherehe hizo zimehudhiriwa na wananchi zaidi ya 1000 ambapo walimpongeza Lekule kwa kuwa amewaletea maendeleo ,ikiwemo Elimu ,Afya pamoja na kumaliza migogoro ya ardhi ambayo iliwakosesha amani kwa muda mrefu bila kupata msaada.

Mzee Lekule amewahi kuwa kiongozi kuanzia ngazi ya kijiji na mpaka alipostaafu alikuwa mwenyekiti wa Chama cha mapinduzi mkoa wa Arusha.