CCM wamshukia Mkurugenzi wa Jiji la Dodoma Kumpiga Mtumishi

Chama Cha Mapinduzi (CCM) Wilaya ya Dodoma Mjini kimelaani kitendo cha Mkurugenzi wa Jiji la Dodoma, Godwin Kunambi kumpiga mtumishi wa ofisi yake, Damas Mwakindingo ndani ya ofisi hiyo

Akizungumza na waandishi wa habari leo Julai 25, 2018, Mwenyekiti wa CCM wa wilaya hiyo, Robert Mwinje amesema kitendo alichokifanya Kunambi hakikubaliki kwa kuwa hakuna sheria  inayoruhusu mtumishi kupigwa

“Sisi kama Chama, kazi yetu ni kushauri lakini pia kushauri kuna mwisho wake,” amesema Mwinje

Katika mkutano huo na waandishi wa habari, Mwinje amembatana na madiwani wa CCM wa Jiji la Dodoma

Hata hivyo, baadaye alipohojiwa kuhusu tuhuma hizo, Kunambi amesema hawezi kuongea chochote kuhusuiana na tuhuma hizo na badala yake akamtaka anayedai kupigwa ndiyo azungumza na waandishi wa habari

“Mimi sina cha kuongea na badala yake ongeeni na huyo wanayesema nimempiga, ila mie nitakutana na huyo mwenyekiti (Mwinje) mahakamani,” amesema Kunambi

Damas Mwakindingo ambaye ni ofisa ardhi wa Jiji anayedaiwa kupigwa na Mkurugenzi wa Jiji alikanusha vikali tuhuma hizo na kusema hajapigwa na Mkurugenzi wa Jiji

“Ni watu tu wamezusha, kwani hata hivyo tulikaa na tukayamaliza, hivyo yamekwisha,” amesema Mwakindingo