Adaiwa kumlawiti mdogo wake wa miaka miwili

Mkazi wa kijiji cha Ihebo Kata ya Muriti wilayani hapa Mkoa wa Mwanza, Ese Benaya (19) anadaiwa kumlawiti mdogo wake mwenye umri wa miaka miwili (mtoto wa baba yake mkubwa) na kumsababishia maumivu makali.

 Akizungumza leo Julai 26, Kamanda wa Polisi Mkoa wa Mwanza Ahmed Msangi amesema tukio hilo lilitokea Julai 25 saa sita mchana kijijini hapo

Kamanda Msangi amesema mtoto huyo alikuwa akicheza na watoto wenzake kwenye nyumba anayoishi mtuhumiwa na hivyo mtuhumiwa huyo alitumia fursa hiyo kuwatuma watoto wenzake dukani kununua sindano ya kushona nguo

Kwa mujibu wa Msangi, mtuhumiwa alimchukua mtoto huyo na kumuingiza ndani kisha kumlawiti na kumsababishia maumivu makali sehemu zake za siri

“Baada ya mtuhumiwa kufanya kitendo hicho cha kikatili alitoroka na kukimbilia kusipojulikana akimuacha mtoto anapiga kelele za kuomba msaada ndipo mama wa mtoto alifika akamkuta mtoto ana hali mbaya na kutoa taarifa polisi,” amesema

Kamanda Msangi amesema wakati polisi ikiendelea kumsaka mtuhumiwa ili sheria ichukue mkondo wake, mtoto amelazwa katika hospitali ya wilaya ya Ukerewe akiendelea na matibabu na kwamba afya yake inaendelea kuimarika