Wabunge waikataa chapa ya mifugo, spika aunga mkono

Mbunge wa Viti Maalumu Matha Mlata ametaka Serikali kuachana kabisa na suala la chapa ya mifugo kwa kuwa inaumiza mnyama bila sababu za msingi

Hoja hiyo imeungwa mkono na Spika wa Bunge Job Ndugai ambaye amesema Wizara imeshindwa kufanya mambo kisomi  hata kufananisha wazee wa zamani ambao waliweka alama mifugo yao na ilitambulika vizuri ingawa hawakuwa wamesoma lakini walithamini mifugo yao na kuwa na huruma

Katika mchango wake kwa Wizara ya Mifugo, Mlata amesema mambo yanayofanywa na Wizara hayaonyeshi kabisa kama wizara hiyo inaongozwa na wasomi

“Kuna msomi gani huko wizarani ambaye anaruhusu kuchoma vyuma vya moto na kuwachoma wanyama wetu bila sababu za msingi, hivi hakuna namna nyingine ya kuweka alama hizo?” amehoji Mlata

Mbunge huyo amepinga suala la operesheni akisema haliko sahihi kwani kuna watu wanaonewa bila sababu za msingi na kwa namna moja linawanufaisha upande wa serikali tu

Mbunge Innocent Bilakwate amepinga suala la chapa akisema limeumiza mifugo kwa kiasi kikubwa na halina tija yoyote hivyo akawataka wataalamu kubuni mbinu nyingine

“Haiwezekani hata kidogo kutumia machuma na kuanza kuwaumiza mifugo halafu ninyi mnafurahia, hivi hamulioni hilo kuna wataalamu gani huko jamani,” alihoji

Mbunge wa Namtumbo Edwin Ngonyani amesema katika eneo lake wameumiza mifugo na chapa hizo hazionyeshi ubora wa aina yoyote zaidi kuacha madonda yasiyotibika kwa mifugo.

 Ngonyani amesema Namtumbo wameumizwa pia kwa kusababishiwa migogoro baina ya wakulima na wafugaji baada ya ng’ombe wengi kupelekwa eneo hilo ambalo ni dogo kijiografia