‘Mimi na Bilago tuliwaangusha waziri na naibu wake 2015’

Mbunge wa Mbozi, Paschal Haonga amebainisha ukaribu wake na Kasuku Bilago, aliyekuwa mbunge wa Buyungu aliyefariki dunia juzi katika Hospitali ya Taifa ya Muhimbili

Aghalabu, wawili hao walikuwa wakiongozana, wakikaa jirani bungeni huku Haonga akisema walifahamiana na kufanya kazi pamoja wilayani Mbozi wote wakiwa walimu

“Urafiki wetu, uliongezeka baada ya mwaka 2015 wote kushinda ubunge kwa kuwaangusha waziri na naibu waziri wa wizara moja ya kilimo, chakula na ushirika,” alisema Haonga

Alisema walifahamiana wakati Bilago akiwa katibu wa Chama cha Walimu Tanzania (CWT) Mbozi na yeye akiwa mwalimu wilayani hapo

“Tulifanya kazi pamoja na kufahamiana... mwaka 2015 tulikuwa na malengo ya kugombea ubunge, yeye (Bilago) akasema atakwenda Buyungu na mimi nitakwenda Mbozi,” alisema Haonga, “Ndoto zetu zilitimia, Bilago akashinda na mimi nikashinda. Kitu pekee kilichoendelea kuweka historia ni kwamba Bilago alimshinda (Christopher) Chiza aliyekuwa waziri wa kilimo na mimi nikamshinda (Godfrey) Zambi aliyekuwa naibu waziri wa kilimo. Yaani tuliwashinda mawaziri wa wizara moja.”

Alisema hata walipofika Dodoma, walipanga nyumba moja eneo la Kisasa wakawa wanaishi pamoja hadi mwezi uliopita Haonga alipohama

“Baada ya kuapishwa mwaka 2015, Bunge lilipoahirishwa tu, Bilago alinisindikiza jimboni Mbozi, ilikuwa Desemba na tulipokewa na umati wa watu kuanzia Airport ya Songwe na nakumbuka siku ya mkutano wetu, mvua kubwa ilinyesha lakini tulihutubia hivyohivyo na wananchi hawakutaka tamaa,” alisema Haonga.

Alisema mwaka jana Bilago alikwenda pia jimboni Mbozi baada ya kualikwa na Haonga kuangalia miradi aliyoitekeleza ikiwamo ya visima vya maji na kumpa ushauri wa jinsi ya kuiboresha

“Bilago aliniambia, amekuja jimboni kwangu mara mbili kwa hiyo imebaki zamu yangu na tulipanga baada ya mkutano wa Bunge hili la Bajeti kumalizika, tutakwenda lakini ndiyo hivyo, ameondoka kabla sijatekeleza ahadi ya kutembelea jimbo lake,” alisema

“Bilago hakuwa rafiki pekee, bali mshauri wangu wa masuala mbalimbali, amenifundisha ujasiri, Bilago alikuwa mtu anayesimamia kile anachoamini na kukisema bila woga. Kifo cha Bilago kimeniuma sana.”

Shughuli za Bunge kuahirishwa

 Kutokana na kifo hicho, shughuli za Bunge la Bajeti zinazoendelea jijini Dodoma zitaahirishwa leo

Katibu wa Bunge, Stephen Kagaigai alisema jana kwamba shughuli hizo zitaahirishwa ili kutoa fursa kwa wabunge kuomboleza msiba huo

Kwa mujibu wa ratiba ya mkutano wa Bunge la Bajeti, leo ilikuwa ni zamu ya Wizara ya Ardhi, Nyumba na Maendeleo ya Makazi kuwasilisha makadirio yake ya mapato na matumizi

Kwa mujibu wa ratiba ya mazishi ya mbunge huyo iliyotolewa jana na Ofisi ya Bunge na Chadema, marehemu Bilago ataagwa leo katika Viwanja vya Karimjee kabla ya kusafirishwa kwenda Dodoma ambako ataagwa kesho

Baada ya kuagwa na wabunge pamoja na wananchi wengine wa Dodoma Jumanne, siku hiyohiyo mwili wake utasafirishwa kuelekea Kakonko ambako utaagwa Jumatano kabla ya kuzikwa Alhamisi kijijini kwake Kasuga umbali wa kilomita saba kutoka mjini Kakonko.

Jana, viongozi wa ngazi za juu wa Chadema wakiongozwa na mwenyekiti wa chama hicho, Freeman Mbowe walikutana nyumbani kwa marehemu Kawe, jijini Dar es Salaam na baadaye mwenyekiti wa Baraza la Vijana Chadema (Bavicha), Patrick ole Sosopi aliwaambia waandishi wa habari kwamba mwili wa marehemu Bilago utaagwa Karimjee leo kuanzia saa sita mchana akisema uamuzi huo umefikiwa baada kikao kilichofanyika jana kati ya familia, Bunge na Chadema.