Wafungwa 3,319 wasamehewa, 585 watolewa jela

Rais John Magufuli ametoa msamaha kwa wafungwa 3,319 katika kuadhimisha miaka 54 ya Muungano wa Tanganyika na Zanzibar

Katibu Mkuu, Wizara ya Mambo ya Ndani ya Nchi, Projest Rwegasira katika taarifa kwa umma iliyotolewa jana amesema wafungwa 585 kati ya waliosamehewa wangeachiwa huru jana na 2,734 watabaki gerezani kumalizia sehemu ya kifungo kilichobaki

“Ni mategemeo ya Serikali kwamba watarejea tena katika jamii kushirikiana na wenzao katika ujenzi wa Taifa na kwamba, watajiepusha kutenda makosa ili wasirejee tena gerezani,” anasema Rwegasira katika taarifa hiyo

Hata hivyo, msamaha wa Rais hautayahusu makundi 21 ya wafungwa wakiwamo waliopatikana na hatia na kuhukumiwa kwa kosa la kuzuia watoto kupata masomo

Mwanaharakati wa kupinga ndoa za utotoni nchini, Rebeca Gyumi alipotakiwa maoni yake kuhusu kutopata msamaha waliozuia watoto kupata masomo alisema ni jambo linalotafsiri msisitizo wa elimu kwa mtoto nchini

Rebeca ambaye ni mkurugenzi wa taasisi ya Msichana Initiative alisema hatua hiyo ni chachu kwa mtoto kuendelea na masomo

Wafungwa waliopewa msamaha na Rais kwa kutumia madaraka aliyopewa chini ya Ibara ya 45(1)(d) ya Katiba ya Jamhuri ya Muungano ni wote wanaopunguziwa robo ya adhabu zao baada ya punguzo la kawaida la moja ya tatu linalotolewa chini ya kifungu 49(1) cha Sheria ya Magereza Sura ya 58

Wafungwa hao sharti wawe wametumikia robo ya adhabu zao gerezani isipokuwa walioorodheshwa katika ibara ya 2(i – xxi), ambao baadhi ni waliohukumiwa adhabu ya kunyongwa au kwa makosa ya kujaribu kuua; waliohukumiwa kunyongwa na adhabu hiyo kubadilishwa kuwa kifungo cha maisha au kifungo gerezani; na waliohukumiwa kifungo cha maisha gerezani

Wengine ni wanaotumikia kifungo kwa makosa ya kujihusisha na usafirishaji na matumizi ya dawa za kulevya.