TCRA yatwishwa jukumu kampuni za mitandao shuleni

Mamlaka ya Mawasiliano Tanzania (TCRA), imetakiwa kuisimamia mitandao ya simu za mkononi inayopeleka huduma za Teknolojia za Habari na Mawasiliano (Tehama) shuleni ili kuepusha kupeleka huduma hiyo eneo moja

Rai hiyo imetolewa leo Aprili 25 na Naibu Katibu Mkuu Wizara ya Uchukuzi na Mawasiliano, Dk Ave Maria Semakafu wakati wa maadhimisho ya kimataifa ya Tehama ya mtoto wa kike inayofanyika kila mwaka Aprili 25

Dk Semakafu amesema kampuni zimekuwa zikijikita eneo moja na wakati mwingine shule moja, huku mahitaji ya huduma hiyo ni makubwa hususan katika shule zilizopo vijijini

"Yaani kuna wakati unakuta shule moja, vodacom,aitrl, tigo wote wapo hapo kisa tu shule hiyo ipo mjini wakati wengine wanhgeweza kwenda kwingine, hebu TCRA zisimamieni kampuni hizi ili kileta tija,” amesema katibu huyo

Kuhusu siku ya Tehama kwa watoto wa kike, amesema itumike katika kujitafakari nini cha kufanya kupitia teknolojia mbalimbali zinazovumbuliwa kufikia Tanzania ya Viwanda

Awali, Kaimu Mkurugenzi Mkuu wa TCRA, Raymond Mfutahema amesema katika siku hiyo pia pamoja na shughuli nyingine wamegawa vitabu 36 vya muongozo wa matumizi ya mitandao uliotolewa hivi karibuni

Mbali na shule pia amesema wameshasambaza nakala zake 16,000 katika maeneo mbalimbali ya nchi ambayo itasaidia watu kusoma sheria hizo na kuepuka kuingia katika mitandao.