Watanzania wasikubali kaundamana

Naibu Waziri wa Mambo ya Ndani ya Nchi, Mhandisi Hamad Masauni ameendelea kuwasisitizia watanzania kuacha kurubuniwa kiakili na baadhi ya watu wasiosihi Tanzania kukubali kufanya maandamano kwa madai watakaothubutu kufanya hivyo hawatapona.

Masauni ametoa kauli hiyo leo (Machi 15, 2018) wakati wa uzinduzi wa vituo sita vya polisi vinavyohamashika katika Mkoa wa Kipolisi Kinondoni Jijini Dar es Salaam leo na kusema wapo watu wachache wanaotaka kuwapotosha vijana kuacha kuchangamkia fursa za maendeleo na kutaka waingie katika maandamano yasioyokuwa na tija ndani yake.

"Katika kipindi hichi wakati nchi yetu inaelekea katika muelekeo mzuri wa kiuchumi na kwamba agenda nyingi zilizokuwa kero wa wananchi zimeweza kutatuliwa chini ya uongozi wa awamu ya tano ila kuna baadhi ya watu waliopo ndani ya nchi na wengine wanaweza kuwepo nje ya Tanzania ambao ni maadui wa mafanikio ambao wanataka sasa kututoa katika mstari uliyonyooka kwa kuibua agenda za kipuuzi, kitoto na zisizokuwa za msingi. Mimi nasema nafasi hiyo hawana", amesema Mhandisi Masauni.

Pamoja na hayo, Mhandisi Masauni ameendelea kwa kusema "kamwe serikali kupitia Wizara ya Mambo ya Ndani ya nchi na idara zake zote hatutoruhusu mtu atutoe katika agenda ya msingi ya maendeleo ya nchi hii kwa kutengeneza vitu vya kipuuzi tu. Kuna mtu anawataka watanzania waache fursa hizi za elimu, ajira kupitia viwanda vilivyopo nchini eti wakaandamane. Sasa kama kuna wapuuzi wawili watatu mimi nasisitiza tu wajaribu na waone.Inapotokea suala la ulinzi na usalama wa nchi hii, vyombo vyetu vipo imara katika hilo.

Kwa upande mwingine, Mhandisi Hamad Masauni amewataka watanzania waendelee kuunga mkono Rais Magufuli kwa kuwa nchi ipo vizuri na inaelekea katika sehemu nzuri.