Rc Maganga aongoza Mamia kumzika Dk Kabourou

Mkuu wa Mkoa wa Kigoma, Emmanuel Maganga ameongoza mamia ya wananchi mkoani hapa katika  mazishi ya aliyekuwa Mbunge wa Kigoma Mjini,  Amani Kabourou aliyefariki dunia Machi 7, 2018 katika Hospitali ya Taifa ya  Muhimbili (MHN) alipokuwa akipatiwa matibabu.

Kabourou amewahi kuwa mbunge wa Kigoma Mjini mwaka 1995-1999 na 2000-2005 kupitia Chadema, mwaka 2006 alijiunga CCM na kuchaguliwa mbunge wa Bunge la Afrika Mashariki. Mwaka  2012 hadi 2017 alikuwa mwenyekiti wa CCM Mkoa wa Kigoma.

Akitoa salamu za rambirambi leo Machi 9, 2018, Maganga amesema Kabourou alikuwa mwana mageuzi na ndiyo maana alikubalika na kupata uongozi katika nyanja mbalimbali ndani na nje ya nchi

Amesema ni vyema wananchi wa Kigoma na Taifa kuiga mema yaliyofanywa na marehemu katika jamii ikiwa  ni pamoja na kutoa ushirikiano kwa kila mtu bila kujali umri, itikadi au chama chake.

Akimzungumzia  Kabourou, Mbunge wa Kigoma Mjini (ACT-Wazalendo), Zitto Kabwe amesema marehemu  ana historia kubwa na ya pekee katika mkoa huo kwani ndiye aliyewafungua macho kisiasa.

Amesema mkoa huo uliokuwa nyuma kisiasa kabla ya Kabourou kuingia kwenye siasa na baada ya kuingia watu wengi walipata mwamko na kuanza kujua haki zao na kuzisemea

"Sisi wengine hapa mnavyotuona ni matunda ya kazi ya Dk Kabourou. Pamoja siku za nyuma tulitofautiana lakini aliendelea kuweka masilahi ya wana Kigoma mbele," Amesema Zitto. 

Pia, mbunge huyo amesema tayari ameiagiza Halmashauri ya Manispaa ya  Kigoma ujiji kuitisha kikao maalumu kupitisha jina la Dk Kabourou ili liwe jina la  barabara ya kutoka na kuingia kiwanja cha  ndege cha  Kigoma.

Mwenyekiti wa CCM Kigoma, Ammandus  Nzamba amesema Dk Kabourou enzi ya uhai wake  alikuwa mtu wa kusimamia anachokiamini na kutoyumbishwa na kitu chochote.

Katibu mwenezi wa Chadema Wilaya ya Kigoma Mjini, Idd Ngesha amesema kifo cha mwanasiasa huyo kimeacha pengo kubwa kwani alikuwa na mchango katika kukipaisha chama hicho.

Dk Kabourou aliyekuwa akisumbuliwa na ugonjwa wa mapafu, ameacha mke na watoto 12.