MTAZAMO : Wizara ya michezo ni kama haipo, tazameni vizuri

Kwa nini taasisi za kijamii zisipendekeze awamu moja ya uongozi wa Serikali iwe na miaka sita au saba badala ya kuhimiza utawala wa awamu mbili za miaka mitano mitano? Nadhani wafanyie kazi jambo hili.

Barani Afrika,kitendo cha kiongozi wa Serikali (Rais) kubadilisha katiba ili akae madarakani kwa awamu ya tatu kimekuwa kikilalamikiwa na taasisi za kijamii na Jumuiya za Kimataifa.

Hivi karibuni rais wa Burundi, Pierre Nkurunziza alibadilisha katiba ya nchi hiyo kwa ajili ya kuwania urais kwa awamu ya tatu, pia rais wa Rwanda, Paul Kagame ameanzisha mjadala nchini kwake wananchi waamue kama wanakubali awanie urais kwa awamu ya tatu.

Wananchi wa Nigeria, Malawi, Zambia, Tanzania na Burkina Faso wenyewe wamekataa suala la awamu tatu, lakini haijawasaidia, kwani bado zina matatizo ya kiuchumi, kijamii na matatizo ya kisiasa kama rushwa.

Matatizo hayo yanatokana na udhaifu wa wizara za Serikali, hakuna wizara imara. Hata hapa nchini hakuna wizara imara, ndiyo maana wizara inayosimamia michezo siyo imara. Kwa hiyo sidhani kama ni kweli suala la awamu tatu linazuia maendeleo ya nchi, kwani kiongozi kama anaweza kujenga wizara zake imara ni anaweza tu na kama hawezi basi hawezi tu hata ukimpa awamu nne.

Unajua nimeenda nchi nyingi za Afrika na nilichokiona barani Afrika ni kwamba tunaiga demokrasia za nchi za Ulaya bila kuelewa maana ya demokrasia. Viongozi wengi wa Afrika wanataka awamu ya tatu kwa sababu wanajua kwamba baadhi ya nchi za Ulaya kuna viongozi (Mawaziri Wakuu na Machansela) wameongoza kwa awamu tatu. Hata hivyo viongozi hao wa Afrika wanaweka kando hoja ya msingi kwamba nchi hizo za Ulaya zinatumia mfumo wa uongozi wa kibunge (Chama ambacho kinashinda viti vingi vya ubunge ndiyo kinatoa Waziri Mkuu anayeongoza Serikali na hakuna rais, lakini nchi za Afrika hazina mfumo huo zina mfumo wa kuwa na rais anayeongoza Serikali na nchi).

Katika mfumo huo wa kibunge wa nchi hizo za Ulaya, viongozi wa taasisi na Waziri Mkuu wanaweza kuondolewa madarakani kiraisi sana kama wapiga kura au wanachama wao wamewachoka.

Tunatakiwa tukumbuke kwamba nchi za Ulaya zina viwanda vingi, wananchi wana elimu ya juu ya uraia na wapiga kura hawanunuliki. Ni kinyume kabisa na nchi za Afrika ambazo viongozi wanataka kuongoza kwa awamu tatu huku wakishindwa kujenga wizara ambazo ni imara moja ya wizara hizo ikiwa ile inayosimamia michezo.

Sasa unaweza kujiuliza, je, kiongozi kuongoza kwa awamu tatu ni kitendo cha kuzuia maendeleo? kwa upande wangu naona siyo kweli. Kiongozi kuongoza kwa awamu tatu siyo kosa kama wizara zitakuwa huru, imara na zinazofanya kazi kwa ufanisi, rushwa itakuwa kwa kiwango cha chini, chaguzi zinaendeshwa kwa uhuru na haki, wapiga kura watakataa kununuliwa na wanasiasa watakuwa siyo wala rushwa.

Ninasema hivyo kwa sababu, kama mtakumbuka rais wa kwanza wa Namibia, Sam Nujoma baada ya kusimamia vizuri nchi yake na kujenga wizara zake imara ndani ya awamu mbili alipewa awamu ya tatu na wananchi wa nchi hiyo bila ya kubadilisha katiba, kwa hiyo tatizo siyo awamu tatu ila ni kuwa na wizara imara.

Ndiyo, hata mimi ninaamini kinachotakiwa ni wizara imara ikiwamo wizara ya michezo. Kwa sababu hatuna wizara imara nchini, ndiyo maabu haitengewi fedha za miradi ya maendeleo, pia hata wizara nyingine nazo hazifanyi vizuri tazameni muone.ana sishangai kuona hakuna maendeleo ya michezo kwani wizara inayoongoza michezo ni kama haipo kwa sasa

mwananchi