OLESABAYA AUMWA ASHINDWA KUFIKA MAHAKAMANI KESI YAAHIRISHWA

KESI ya Unyang'anyi wa kutumia silaha inayomkabili aliyekuwa Mkuu wa wilaya ya Hai, Lengai Ole Sabaya na wenzake wawili imeshindwa kuendelea baada ya Sabaya kuugua na kushindwa kugoka mahakamani.

 Mkaguzi Msaidizi wa Magereza,  Ramadhani Misanga leo ameieleza mahakama ya hakimu mkazi Arusha, mbele ya Hakimu Mkazi Mwandamizi, Odira Amworo kuwa Sabaya anaumwa na amepatiwa dawa na ametakiwa kupumzika kwa siku moja.

Mkaguzi msaidizi wa magereza, Inspekta Msaidizi, Ramadhani Misanga nashukuru mheshimiwa  hakimu mteja wetu na wa mawakili wa utetezi hajaweza kugika kwa sababu kama ilivyo kawaida mahabusu wote baada ya kupata kifungua kinywa wale ambao hawajisilii vizuri huenda kumuona daktari.

Misanga alisema kuwa asubuhi alipata taarifa kutoka kwa mkuu wa gereza kuwa mshitakiwa wa kwanza ( Sabaya) hajisikii vizuri amepewa dawa na mapumziko ya siku moja.

 "Nikiwa ofisini mshitakiwa wa kwanza alinifuata kunijuza hajisikii vizuri ameenda kwa daktari amepewa dawa na  ana mapumziko ya siku moja hivyo kesho atahudhuria mahakamani lakini kwa kuwa ni ugonjwa si hakika sana kama atakuwa amepona na aweze kufika," Misanga aliieleza mahakama .

 Awali Wakili wa Serikali Mkuu, Tumaini Kweka, aliieleza mahakama hiyo kuwa shauri limekuja mahakamani hapo kwa ajili ya shahidi wa saba, Mkuu w upelelezi wilayani Arusha, Gwakisa Minga kuendelea na ushahidi wake pale alipoishia jana.

 

" Mheshimiwa hakimu tumepata mawasiliano kutoka uongozi wa magereza ambao unawaleta hawa washitakiwa kuwa mshitakiwa namba moja, Lengai ole Sabaya ameshindwa kufika mahakamani kwa sababu za kiafya," wakili huyo wa serikali ameieleza mahakama.

Ameendelea kueleza mahakamani hapo kuwa kwa mujibu wa sheria ya usikilizaji wa mashauri ya jinai kifungu cha 196 na sheria inayosimamia mwenendo wa mashahuri ya jinai sura ya 20 kama kilivyofanyiwa wanasema  juzuu ya mwaka 2019 inasema usikilizaji wa shauri la jinai ni lazima ufanyike mshitakiwa akiwa mahakamani. 

 Hata hivyo Wakili Kweka aliieleza mahakama hiyo kuwa shauri linaweza kuendelea bila mshitakiwa kuwepo mahakamani kwa sababu mbili tu.

 " Mheshimiwa hakimu  kifungu 197 cha sheria inayosimamia uendeshaji wa mashauri ya jinai kinaeleza mazingira gani mahakama inaweza kuendelea bila mshitakiwa kuwepo mahakamani," ameeleza wakili Kweka na kuongeza 

 .Kutokana na habit ya mshitakiwa mahakama itaagiza shauri liendelea bila mshitakiwa kuwepo. Mbili endapo mshitakiwa hatakuwa mahakamani kwa matatizo ya kiafya na anawakilishwa na mawakili na ameridhia kwa mawakili wake kuwa kesi iendelee pasipo uwepo wake....

 ..Hili letu liko kwenye  kifungu cha pili lakini hatujui mawakili wake kama wamepewa ridhaa na mshitakiwa tuendelee. Sisi tuko tayari kuendelea na shahidi wetu.

Ni hayo tu,".

Baada ya maelezo hayo wakili wa mshitakiwa wa kwanza, Dancan Oola aliieleza mahakama hiyo kuwa anakubaliana vifungu vyote vya sheria alivyosoma wakili  viko sawa.

 "Swali kama tumepewa ridhaa ya kuendelea, hatujapewa hiyo ridhaa hivyo mheshimiwa tunaomba tarehe nyingine kwa ajili ya kusikilizwa kwa ushahidi,". wakili Oola aliieleza mahakama.

Baada ya wakili mkuu wa serikali, Kweka na Wakiki wa utetezi kueleza hayo Hakimu Mkazi Mwandamizi, Amworo  aliwataka afisa wa magereza kutoa uelewa juu ya hali ya mshitakiwa ndipo Mkaguzi Msaidizi wa Magereza,   Misanga akatoa maelezo.

 Baada ya maelezo hayo hakimu ameahirisha shauri hilo mpaka kesho Agosti 5, mwaka huu shauri hilo litakapokuja mahakamani hapo kwa ajili ya shahidi wa saba kuendelea na ushahidi wake.

 Washitakiwa wengine Silvester Nyegu na Daniel Mbura  walirejeshwa mahabusu kwenye gereza la Kisongo kwani kesi inayowakabili haina dhamana.