VIJANA WA CHADEMA WAMTUMIA UJUMBE RAISI MAMA SAMIA

Baraza la Vijana Chadema (Bavicha) limemuomba mambo mawili Rais wa Tanzania Samia Suluhu Hassan ambayo ni kuwa na tume huru ya kweli na maridhiano pamoja na kurejesha mchakato wa kupata katiba mpya.

Bavicha wametoa mapendekezo hayo leo Jumanne Machi 30,2021 kupitia kwa mwenyekiti wa baraza hilo, John Pambalu katika mkutano wake na waandishi wa habari.

Amesema matamshi ya Samia yanaonyesha ni rais anayependa kufuata utaratibu wa katiba, “sisi Bavicha tuna mambo mawili makuu tunapenda tuyazungumze ikiwa ni utangulizi wa mwanzo kuelekea miaka minne iliyosalia kumaliza ngwe hii kuelekea mwaka 2025.”

"Tunaishauri Serikali umuhimu wa kuwa na tume huru ya kweli na ya maridhiano, tume ambayo itataka kujiridhisha na kuchunguza kwa kina juu ya uovu wote ambao umefanyika," amesema.

Pia baraza hilo limemuomba  Rais Samia kuwaachilia huru wafungwa waliofungwa kwa ajili ya kesi za kisiasa kwa madai kuwa njia hiyo ni nzuri katika jamii.

"Ili kuliponya Taifa na kuleta maridhiano wapo watu waliokamatwa kwa kesi za kisiasa na wengine kubambikiwa tunamshauri Rais na Serikali kuelekeza kesi hizo kufutwa," amesema.