Polisi yaeleza undani jeneza lililokutwa sokoni

Kamanda wa Polisi Mkoa wa Mbeya, Ulrich Matei amesema kuwa jeneza lililokutwa juu ya meza katika soko la Soweto mkoani Mbeya, lisihusishwe na imani zozote za kishirikina kwani jeneza lile lilikuwa ni mali ya msikiti wa Soweto. 

Akizungumza leo Januari 2, 2020, mkoani humo, Kamanda Matei amesema kuwa jeneza hilo lilibebea mwili wa Masoud Mohamed mkazi wa Makambako, aliyefariki dunia katika hospitali ya Rufaa ya Kanda ya Mbeya, ambapo alikuwa akipatiwa matibabu ya na ugonjwa wa mapafu.

"Disemba 23, 2019 alifariki na kuswaliwa katika Msikiti wa Taufiq uliopo Block Q Soweto, mwili wa marehemu ulihifadhiwa kwenye jeneza kwa ajili ya kusafirishwa Makambako na ulizikwa siku hiyo hiyo na baada ya kumaliza mazishi jeneza lilibaki kule baada ya kukosa usafiri wa kulirudisha Mbeya" amesema Kamanda Matei.

Aidha Kamanda Matei ameongeza kuwa mnamo Disemba 31, 2019, Ally Mohamed, mkazi wa Makambako alimkabidhi jeneza dereva wa lori la nyanya ili aweze kulipeleka Mbeya na kumpatia namba ya simu ya Hamis Mussa Hamad, ili alipokee jeneza hilo.

"Dereva alifika Soweto majira ya usiku na alivyoipiga simu ya Hamis haikuwa ikipatikana kwa vile alikuwa na mzigo wa kupeleka Tunduma, ilibidi alikabidhi hilo jeneza kwa mlinzi wa soko la Soweto ili asubuhi alikabidhi kwa uongozi wa Msikiti huo ambapo naye hakufanya hivyo" amesema Kamanda Matei.