Wafugaji Ngorongoro wakaribisha wawekezaji

BARAZA la Wafugaji Ngorongoro, limeziondoa hofu kampuni za wawekezaji wanaoonyesha nia ya kuwekeza katika Mamlaka ya Hifadhi ya Ngorongoro (NCAA), kuwa watapokelewa na kushirikiana nao

Hatua ya Maura kutoa ukaribisho wa kushirikiana na wawezaji hao ilifuatia hofu iliyoonyeshwa na baadhi ya wawekezaji kuhusu uwepo wao katika eneo hilo

Kwa mujibu wa sheria, NCAA ni hifadhi ambayo inaruhusu uwepo wa makazi ya binadamu na mifugo

Akizungumza katika mkutano huo, Naibu Waziri wa Maliasili na Utalii, Japhet Hasunga, alisema baadhi ya maeneo ya uwekezaji wa kitalii yamekuwa na matatizo na wawekezaji isipokuwa NCAA

“Baraza limesema hapa, wapo tayari kushirikiana pamoja na wawekezaji,” alisema

Aliwapongeza NCAA kuwaleta pamoja wawekezaji na kuwaonyesha fursa au maeneo ya uwekezaji ambayo yataongeza idadi ya watalii hadi kufikia milioni mbili kwa mujibu wa matarajio ya Ilani ya Uchaguzi ya CCM 2020

Hivi karibuni, Rais John Magufuli alisisitiza umuhimu wa sekta ya utalii kuongeza idadi ya watalii wanaokuja nchini

Kwa upande wake, Naibu Mhifadhi Mkuu wa NCAA, Dk. Maurus Msuha, alielezea umuhimu wa kuwekeza katika maeneo ya vivutio vilivyopo ili kuwashawishi watalii kutumia siku nyingi kukaa kutembelea vivutio hivyo badala ya siku moja au mbili

Naye Mkuu wa Wilaya ya Ngorongoro, Rashid Taka, aliwahamasisha wananchi kushiriki kwa wingi kikamilifu katika uwekezaji.

Alisema jamii inayowazunguka inategemea kunufaika na mapato ya uwekezaji huo

Mapema wiki iliyopita, wawekezaji hao walitembelea maeneo mbalimbali ya vivutio vilivyopo NCAA kwa lengo la kuainisha aina ya uwekezaji unaofaa

Maeneo waliyotembelea ni OIduvai kwa ujenzi wa kiwanja cha ndege, kituo cha mafuta, Makumbusho ya masalia ya Zamadamu na zana zake yaliyopo Olduvai Gorge, kituo cha jamii cha Olduvai kwa ajili ya shughuli za kitamaduni, jengo la chakula, eneo la Laetoli ambako nyayo za binadamu wa kale ziligunduliwa

Sehemu zingine ni kreta hususani, katika banda maalum ambalo limejengwa kwa ajili ya kumtunza faru Fausta ambaye ni mzee wa umri wa miaka 55, sasa na mtoto wa simba ambaye amefanyiwa upasuaji mara kadhaa