USHAHIDI DHIDI YA KESI MHASIBU MKUU BODI YA PAMBA BADO HAUJAKAMILIKA

UPANDE wa mashtaka katika kesi ya uhujumu uchumi inayomkabili Mhasibu Mkuu wa bodi ya Pamba Tanzania Simon Maganga umeieleza Mahakama ya Hakimu Mkazi Kisutu kuwa, upelelezi dhidi ya kesi hiyo bado haujakamilika

Wakili wa Taasisi ya Kuzuia na Kupambana na Rushwa (Takukuru), Maxi Ali ameeleza hayo leo Julai 24 mwaka 2018 mbele ya Hakimu Mkazi Mkuu, Janeth Mtega, kesi hiyo ilipokuja kwa kutajwa

Wakili Maxi amedai mahakamani hapo kuwa, kesi ilipangwa kwa ajili ya kutajwa.Upelelezi wake bado haujakamilika na akaomba ipangiwe tarehe nyingine ya kutajwa ili kuangalia kama upelelezi utakuwa umekamilika ama la

Kutokana na taarifa hiyo, Hakimu Mtega ameahirisha kesi hiyo hadi Agosti 23 mwaka 2018

Mshtakiwa anakabiliwa na mashtaka manne  ya matumizi ya nyaraka kwa lengo la kumdanganya mwajili,moja la ufujaji na ubadhilifu  na uhujumu uchumi kwa kusababisha hasara ya Sh 55,637,680

Katika shtaka la kwanza mshtakiwa huyo wanadaiwa  kuwa kati ya Januari Mosi, 2009 na Desemba 31,2010 katika ofisi ya bodi ya Pamba  Tanzania iliyopo Wilaya ya Ilala akiwa mtumishi wa umma, Mhasibu Mkuu kwa lengo la kumdanganya mwajiri wake

Ambapo alitumia vocha za kuwasilisha mbegu za pamba msimu wa 2009/2010 akijaribu kuonesha kampuni ya Afrisian Ginning Ltd ilinunua mbegu za Pamba kilo  25,129,258k wakati wakijua si kweli

Katika shtaka la pili anadaiwa kuwa katika kipindi hicho,mshtakiwa huyo akiwa na lengo la kumdanganya mwajiri wake alitumia vocha za kuwasilisha mbegu za Pamba msimu wa mwaka 2009/2010 akijaribu kuonesha kampuni ya Nyanza Cooperative Ltd ilinunua kilo 3,708,998 za mbegu za Pamba wakati akijua si kweli

Katika shtaka la tatu,Maganga anadaiwa katika kipindi hicho, akiwa na lengo la kumdanganya mawajili wake alitumia vocha za kuwasilisha mbegu za pamba msimu wa mwaka 2009/2010 akijaribu kuonesha kampuni ya kampuni ya S&C Ginning Ltd  ilinunua kilo 17,152,590 za mbegu za pamba wakati akijua si kweli

Katika shtaka la nne, mshtakiwa huyo anadaiwa  kuwa katika kipindi hicho akiwa na lengo la kumdanganya mwajili wake alitumia vocha za kuwasilisha mbegu za Pamba msimu wa mwaka 2009/2010 akijaribu kuonesha kampuni ya kampuni ya Kahama Oil Mill Ltd ilinunua 16,326,038  za mbegu za Pamba wakati akijua si kweli

Wakati katika shtaka la tano, mshtakiwa huyo anadaiwa kuwa katika kipindi hicho akiwa katika ofisi ya bodi ya Pamba Tanzania, alifanya ufujaji na ubadhilifu wa Sh 55,637,680 mali ya aliyopewa na bodi ya Pamba Tanzania

Pia mshtakiwa huyo anadaiwa kuwa kati ya Januari Mosi mwaka 2009 na Desemba 31 mwaka 2010 akiwa Mhasibu Mkuu wa Bodi ya Pamba Tanzania kwa makusudi aliisababishia mamlaka hiyo hasara ya Sh 55,637,680