Naibu waziri wa elimu afurahishwa na matokeo ya Shule iliyoshika nafasi ya 60 kitaifa wilayani Ngorongoro

Naibu waziri wa Elimu sayansi na Teknolojia Mh William Olenasha ametembelea walimu na wanafunzi wa Shule ya Sekondari Embarway  iliyoko wilayani Ngorongoro mkoani Arusha na kuwapongeza kwa kufanya vizuri katika matokeo ya kidato cha sita ambapo shule hiyo kitaifa ilishika nafasi ya 60 na kimkoa ilishika nafasi ya tatu jambo ambalo halijawahi kutokea katika Historia ya Wilaya hiyo

 

Alipofika shuleni hapo Mh Olenasha alipokelewa na walimu pamoja na kamati ya shule na kukagua madarasa mapya yanayojengwa na kukagua eneo litakalojengwa Hostel na baadae kuzungumza na walimu pamoja na wanafunzi wa shule ya Embarway.

Mh Olenasha amesema ni jambo la kupongezwa walimu wa shule hiyo ambapo wameandikia historia wilaya ya ngorogoro pamoja taifa na kuwahimiza kuendelea kufanya vizuri zaidi katika mitihani mingine ikiwemo ya kidato cha nne.

“Matokeo ambayo mmepata kuhusiana na wanafunzi wazazi na wadau wengine ni matokeo ya kihistoria na ni hakika hata kama imetokea mara moja badi nyie mtaingia kwenye historia kwamba ni kati ya walimu ambao mmeleta mafanikio makubwa ya elimu wilaya ya ngoronngoro mkoa wa Arusha na taifa kwa ujumla”Amesema Mh Olenasha

Amesema kuwa hiyo inatokana na walimu hao kujituma ambao pia wamefuta kumbukumbu ya baadhi ya watu wanaoamini kuwa shule za serikali hazifanyi vizuri.

Awali akizungumza na wanafunzi wa Shule hiyo amewataka kusoma kwa bidii zaidi ili waendelee kufanya vizuri katika matokeo mengine yanayokuja ambapo wanafunzi wamemuahidi Mh Olenasha kuwa watafanya vizuri zaidi kuliko matokeo hayo ya kidato cha sita.